महाराष्ट्र 24 | विशेष प्रतिनिधी | दि. १० | Railway Megablock In Pune : पुणे रेल्वे मार्गावर प्रवास करणाऱ्या लाखो प्रवाशांसाठी महत्त्वाची आणि धक्कादायक बातमी समोर आली आहे. मुंबईप्रमाणेच आता पुण्यातही तब्बल दहा दिवसांचा सर्वात मोठा रेल्वे मेगाब्लॉक जाहीर करण्यात आला आहे. दौंड–मनमाड रेल्वे मार्गावरील दौंड ते काष्टी दरम्यान दुहेरीकरणाचे काम हाती घेण्यात आल्याने, १५ ते २५ जानेवारी दरम्यान रेल्वे वाहतूक मोठ्या प्रमाणावर विस्कळीत होणार आहे. या कालावधीत पुण्यातून मुंबई, सोलापूर, सातारा तसेच देशातील विविध राज्यांकडे धावणाऱ्या अनेक महत्त्वाच्या एक्सप्रेस, इंटरसिटी आणि डेमू गाड्या रद्द करण्यात आल्या असून, काही गाड्यांचे मार्ग बदलण्यात आले आहेत. त्यामुळे दैनंदिन प्रवासी, नोकरदार आणि लांब पल्ल्याचा प्रवास करणाऱ्यांची मोठी अडचण होण्याची शक्यता आहे.
रेल्वे प्रशासनाच्या माहितीनुसार, या काळात प्री-नॉन-इंटरलॉकिंग आणि नॉन-इंटरलॉकिंग कामांसाठी वाहतूक व पॉवर ब्लॉक लागू केला जाणार आहे. याचा थेट परिणाम पुणे–सोलापूर आणि पुणे–अमरावतीसारख्या वर्दळीच्या मार्गांवर होणार आहे. पुणे–सोलापूर एक्सप्रेस, सोलापूर–पुणे इंटरसिटी, पुणे–सोलापूर आणि सोलापूर–पुणे डेमू, तसेच पुणे–दौंड डेमू या गाड्या पूर्णपणे रद्द करण्यात आल्या आहेत. याशिवाय २३ ते २६ जानेवारीदरम्यान पुणे–अमरावती, अमरावती–पुणे, अजनी–पुणे, निजामाबाद–पुणे, पुणे–नागपूर गरीब रथ आणि पुणे–नांदेड एक्सप्रेससारख्या महत्त्वाच्या गाड्याही धावणार नाहीत. या रद्दीमुळे प्रवाशांना पर्यायी वाहतुकीचा आधार घ्यावा लागणार आहे.
मेगाब्लॉकमुळे काही लांब पल्ल्याच्या गाड्यांचे मार्गही बदलण्यात आले आहेत. यशवंतपूर–चंडीगड, जम्मू तवी–पुणे आणि हजरत निजामुद्दीन–वास्को-द-गामा एक्सप्रेस आता मनमाड–इगतपुरी–कल्याण–पनवेल–लोणावळा मार्गे पुण्यात येणार आहेत. सातारा–दादर एक्सप्रेस जेजुरी मार्गे धावेल, तर तिरुवनंतपुरम–CSMT एक्सप्रेस कुर्डुवाडी–मिरज मार्गे वळवण्यात आली आहे. यामुळे प्रवासाचा वेळ वाढण्याची शक्यता असून, प्रवाशांनी विलंबासाठी मानसिक तयारी ठेवणे आवश्यक आहे.
दरम्यान, काही गाड्यांना अल्पकालीन समाप्ती देण्यात आली आहे. इंदूर–दौंड आणि ग्वाल्हेर–दौंड एक्सप्रेसचा प्रवास दौंडऐवजी खडकी स्थानकावरच संपणार आहे. परतीच्या प्रवासातही बदल करण्यात आले असून, दौंड–इंदूर एक्सप्रेस पुण्याहून, तर दौंड–ग्वाल्हेर एक्सप्रेस खडकीहून सुटणार आहे. रेल्वे प्रशासनाने प्रवाशांना प्रवासापूर्वी अद्ययावत वेळापत्रक आणि ट्रेनची स्थिती तपासण्याचे आवाहन केले आहे. अन्यथा, अचानक रद्द किंवा मार्ग बदलामुळे प्रवाशांचा प्रवास खोळंबण्याची शक्यता नाकारता येत नाही. 🚆