🔥 अमेरिकेचा व्हिसा बॉम्ब! ट्रम्प यांचा ७५ देशांना थेट दणका — स्थलांतरित व्हिसांवर अनिश्चित काळाची बंदी 🔥

Spread the love

महाराष्ट्र 24 | विशेष प्रतिनिधी | दि. १५ जानेवारी | डोनाल्ड ट्रम्प यांनी दुसऱ्यांदा व्हाइट हाऊसमध्ये पाऊल टाकताच जगाला पुन्हा एकदा धक्का दिला आहे. “अमेरिका फर्स्ट”चा नारा केवळ भाषणांपुरता न ठेवता त्यांनी थेट कृतीत उतरवला आहे. बेकायदा स्थलांतरितांची धरपकड, आयात शुल्कवाढ, आक्रमक व्यापार करार यानंतर आता ट्रम्प प्रशासनाने थेट पाकिस्तान, बांगलादेशसह तब्बल ७५ देशांतील नागरिकांना स्थलांतरित व्हिसा देण्यास बंदी घातली आहे. अमेरिकेच्या परराष्ट्र विभागाने ही माहिती जाहीर करताच आंतरराष्ट्रीय राजकारणात खळबळ उडाली आहे. हा निर्णय केवळ कागदावरचा नसून लाखो लोकांच्या अमेरिकन स्वप्नांवर पाणी फेरणारा आहे.

स्थलांतरित व्हिसा म्हणजे अमेरिकेत कायमस्वरूपी स्थायिक होण्याचा अधिकृत मार्ग. नातेवाईकांचे प्रायोजकत्व, कडक कागदपत्रे आणि दीर्घ तपासणीनंतर मिळणारा हा व्हिसा आता अनेक देशांसाठी “नो एन्ट्री” ठरला आहे. अफगाणिस्तान, पाकिस्तान, इराण, बांगलादेश, रशिया, सोमालिया, हैतीपासून ते आफ्रिका, आशिया, युरोप आणि लॅटिन अमेरिकेतील अनेक देश या यादीत आहेत. विशेष म्हणजे ही बंदी अनिश्चित काळासाठी असून २१ जानेवारी २०२६ पासून ती प्रत्यक्षात लागू होणार आहे. मात्र विद्यार्थी, पर्यटन आणि अल्पकालीन प्रवासासाठीचे नॉन-इमिग्रंट व्हिसा सुरू राहणार असल्याचे प्रशासनाने स्पष्ट केले आहे.

या कठोर निर्णयामागे ट्रम्प यांचा ठाम दावा आहे — अमेरिकेच्या सरकारी कल्याणकारी योजनांवर वाढणारा परदेशी नागरिकांचा बोजा थांबवायचा. गेल्या काही वर्षांत लाखो स्थलांतरित आरोग्य, अन्नसुरक्षा आणि आर्थिक मदतीवर अवलंबून राहिल्याचे प्रशासनाचे म्हणणे आहे. त्यामुळे व्हिसा अर्जदारांची वैद्यकीय, आर्थिक आणि चारित्र्य पडताळणी अधिक कडक करण्यात आली आहे. मात्र अनेक कायदेतज्ज्ञांनी या निर्णयावर प्रश्नचिन्ह उपस्थित केले असून, “आधीच कठोर कायदे असताना अशी सरसकट बंदी कशासाठी?” असा सवाल उपस्थित केला जात आहे. तरीही राष्ट्रीय सुरक्षेच्या नावाखाली अनेक अमेरिकन नागरिकांनी या निर्णयाचे स्वागत केले आहे.

मग भारताचं काय? दिलासादायक बाब म्हणजे भारत या बंदीच्या यादीत नाही. त्यामुळे भारतीय आयटी प्रोफेशनल्स, H-1B व्हिसाधारक आणि विद्यार्थ्यांवर थेट परिणाम होणार नाही. उलट, व्हिसा स्लॉट्स आणि नोकरीच्या संधी भारतीयांसाठी वाढू शकतात, असे तज्ज्ञांचे मत आहे. मात्र ट्रम्प यांचे ‘पब्लिक चार्ज’ धोरण आणि कडक आरोग्य निकष भविष्यात भारतीयांसाठीही अडथळा ठरू शकतात. थोडक्यात काय — ट्रम्प यांचा हा निर्णय म्हणजे जगाला दिलेला स्पष्ट इशारा आहे: अमेरिकेत यायचं असेल, तर स्वतःच्या पायावर उभं राहण्याची ताकद दाखवा!