✍️ महाराष्ट्र २४ | विशेष प्रतिनिधी | दि. २४ फेब्रुवारी २०२६ | Panvel जवळील काळोखे गावाच्या हद्दीत आज पहाटे जुन्या मुंबई–पुणे महामार्गावर भीषण वाहतूक कोंडी निर्माण झाली. भलामोठा कंटेनर जोडरस्त्यावरून वळण घेताना रस्ता ओलांडत असताना त्याचा खालचा भाग रस्त्याला घासून मधोमध अडकला. परिणामी दोन्ही बाजूंनी ये-जा करणारी वाहतूक पूर्णपणे ठप्प झाली.
सकाळी साडेसहा वाजताच्या सुमारास घडलेल्या या प्रकारामुळे Old Mumbai-Pune Highway वर पनवेलकडून पुण्याच्या दिशेला आणि पुण्याकडून पनवेलच्या दिशेला जाणारी वाहने थांबली. अवजड ट्रक, कंटेनर तसेच कामानिमित्त बाहेर पडलेली प्रवासी वाहने यांची मोठी गर्दी असल्याने दोन्ही बाजूंना तब्बल २ ते ३ किलोमीटरपर्यंत वाहनांच्या रांगा लागल्या.
या अचानक झालेल्या कोंडीमुळे चाकरमानी, विद्यार्थी आणि इतर प्रवाशांना सकाळच्या वेळी मोठ्या मनस्तापाला सामोरे जावे लागले. अनेकांनी पर्यायी मार्ग शोधण्याचा प्रयत्न केला; मात्र अरुंद रस्त्यांमुळे तिथेही वाहतूक मंदावली. स्थानिक प्रशासन आणि वाहतूक पोलिसांनी घटनास्थळी धाव घेत अडकलेला कंटेनर हलविण्याचे प्रयत्न सुरू केले आहेत. कंटेनर सुरक्षितरीत्या बाजूला केल्यानंतरच या मार्गावरील वाहतूक पूर्णपणे सुरळीत होईल, अशी माहिती देण्यात आली.
