🚗 जुन्या वाहनधारकांना झटका! 1 एप्रिलपासून ‘ग्रीन टॅक्स’ दुप्पट; खिशावर वाढणार ताण

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ३० मार्च २०२६ ।। वाढत्या प्रदूषणावर लगाम घालण्यासाठी सरकारने आता कठोर पाऊल उचललं आहे. १ एप्रिलपासून जुन्या वाहनांवरील पर्यावरण कर (ग्रीन टॅक्स) दुप्पट करण्यात येणार असून, यामुळे वाहनधारकांच्या खिशावर थेट परिणाम होणार आहे. पुणेसह राज्यभर हा निर्णय लागू होणार आहे.

परिवहन विभागाने २०१० पासून लागू असलेला पर्यावरण कर आता वाढवण्याचा निर्णय घेतला आहे. यामागचा मुख्य उद्देश म्हणजे प्रदूषण करणाऱ्या जुन्या वाहनांचा वापर कमी करणे आणि पर्यावरणपूरक पर्यायांना चालना देणे. नव्या नियमांनुसार, दुचाकी वाहनांसाठी कर २,००० रुपयांवरून थेट ४,००० रुपये करण्यात आला आहे, तर चारचाकी वाहनांसाठी हा कर सुमारे ७,००० रुपयांपर्यंत वाढवण्यात आला आहे.

हा कर विशेषतः १५ वर्षांहून अधिक जुन्या वाहनांवर लागू होतो. व्यावसायिक वाहनांसाठी १५ वर्षांनंतर फिटनेस प्रमाणपत्र घेणं बंधनकारक असून, त्यानंतर दर ५ वर्षांनी एकरकमी ग्रीन टॅक्स भरावा लागतो. आता या दरात दुपटीने वाढ झाल्यामुळे ट्रक, बस, टेम्पो चालकांनाही अतिरिक्त आर्थिक भार सहन करावा लागणार आहे.

सरकारचा दावा आहे की, या निर्णयामुळे Air Pollution कमी करण्यास मदत होईल आणि इलेक्ट्रिक वाहनांकडे लोकांचा कल वाढेल. मात्र, वाहनधारक संघटनांनी या वाढीव कराचा निषेध नोंदवला असून, सामान्य नागरिकांवर आर्थिक ताण वाढणार असल्याचं मत व्यक्त केलं आहे.

एकीकडे स्वच्छ हवा आणि पर्यावरण रक्षणाचा उद्देश, तर दुसरीकडे वाढलेला खर्च—या दोन्हींच्या कात्रीत आता वाहनधारक सापडले आहेत. त्यामुळे १ एप्रिलनंतर रस्त्यावर वाहन चालवणं केवळ गरज नाही, तर ‘महागडा व्यवहार’ ठरण्याची शक्यता आहे.