Maharashtra Heatwave: 🔥 सूर्याचा कहर! उष्माघाताने ३ जणांचा मृत्यू; तरुणाचा बस स्थानकावर दुर्दैवी अंत 🔥

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. १६ एप्रिल २०२६ ।। Maharashtra heatwave deaths latest news : राज्यात उष्णतेने अक्षरशः कहर केला असून महाराष्ट्र होरपळून निघत आहे. विदर्भासह अनेक भागांत तापमान ४० अंशांच्या पुढे गेल्याने उष्माघाताच्या घटना वाढू लागल्या आहेत. अकोला, हिंगोली आणि वाशिम येथे उष्माघातामुळे तीन जणांचा मृत्यू झाल्याची धक्कादायक माहिती समोर आली आहे. सकाळी सात वाजल्यापासूनच उन्हाचा तडाखा जाणवत असून दुपारपर्यंत परिस्थिती अधिक गंभीर बनत आहे. वाढत्या उष्णतेमुळे नागरिकांच्या आरोग्यावर गंभीर परिणाम होत असल्याने आरोग्य विभागाने सतर्कतेचा इशारा दिला आहे.

हिंगोलीत सर्वात धक्कादायक घटना घडली. बस स्थानक परिसरात ३० वर्षीय तरुणाचा उष्माघातामुळे मृत्यू झाला. शेख रफिक शेख उस्मान असे मृत तरुणाचे नाव असून, तो अचानक कोसळल्याने त्याचा जीव गेला. जिल्ह्यात सकाळपासूनच तापमान झपाट्याने वाढत असून दुपारी ४० अंशांवर पोहोचत आहे. दुसरीकडे वाशिममध्येही एका ४५ वर्षीय व्यक्तीचा मृतदेह सापडला असून त्याचाही मृत्यू उष्माघातामुळे झाल्याचा संशय व्यक्त केला जात आहे. या घटनांमुळे प्रशासन आणि आरोग्य यंत्रणा सतर्क झाली आहे.

दरम्यान, राज्यात उष्माघाताचे रुग्णही वाढत आहेत. गेल्या दीड महिन्यात १७ हून अधिक रुग्णांची नोंद झाली असून पुणे आणि रत्नागिरी जिल्ह्यांत सर्वाधिक रुग्ण आढळले आहेत. हवामान खात्याने पुढील काही दिवस अतिउष्णतेचा इशारा दिला असून नागरिकांनी दुपारच्या वेळी बाहेर जाणे टाळावे, भरपूर पाणी प्यावे आणि काळजी घ्यावी, असे आवाहन करण्यात आले आहे. वाढत्या तापमानामुळे उष्माघाताचा धोका गंभीर बनत चालला आहे, त्यामुळे प्रत्येकाने सतर्क राहणे अत्यावश्यक ठरत आहे.