✍️ महाराष्ट्र २४ ।। ऑनलाईन ।। विशेष प्रतिनिधी ।। दि. १६ एप्रिल २०२६ ।। एप्रिल महिना सुरू झाला आणि सोन्याच्या बाजारात पुन्हा एकदा नाट्यमय वळण पाहायला मिळत आहे. काही महिन्यांपूर्वी उच्चांक गाठल्यानंतर थोडी उसंत घेतलेले दर आता पुन्हा झपाट्याने वर चढू लागले आहेत. जागतिक घडामोडी, डॉलरची हालचाल आणि कमोडिटी मार्केटमधील अनिश्चितता यामुळे सोन्याने पुन्हा तेजीत प्रवेश केला आहे. अक्षय तृतीयेच्या अवघ्या काही दिवस आधीच भाव वाढल्याने सर्वसामान्य ग्राहकांची धांदल उडाली आहे. ‘आता घ्यावं की थांबावं?’ या संभ्रमात अनेक खरेदीदार अडकले आहेत. तीन दिवसांतच तब्बल तीन हजार रुपयांची वाढ झाल्याने सोनं पुन्हा ‘सोन्याच्या भावात’ गेलंय, असं म्हणणं चुकीचं ठरणार नाही.
कमोडिटी बाजारातही आज सोन्याने जोरदार झेप घेतली. एमसीएक्सवर १० ग्रॅम सोन्याचा दर जवळपास १,५४,९०० रुपयांवर पोहोचला असून चांदीनेही साथ देत किलोमागे २.५ लाखांच्या पुढे मजल मारली आहे. महाराष्ट्रातील प्रमुख शहरांमध्ये २४ कॅरेट सोन्याचा भाव १,५५,५७० रुपये प्रति १० ग्रॅम इतका नोंदवला गेला आहे, तर २२ कॅरेट सोनंही १,४२,६०० रुपयांच्या घरात पोहोचलं आहे. १८ कॅरेट सोन्याचे दरही वाढीच्या मार्गावर असून बाजारात एकूणच तेजीचं वातावरण आहे. विशेष म्हणजे, एप्रिल महिन्यातील हा आतापर्यंतचा सर्वोच्च दर मानला जात आहे. उच्चांकापासून अजूनही काही हजार रुपयांनी स्वस्त असलं तरी सध्याची वाढ ग्राहकांसाठी मोठी डोकेदुखी ठरत आहे.
या सगळ्या पार्श्वभूमीवर चांदीही मागे नाही. राज्यात आणि देशभरात चांदीचा दर प्रति किलो सुमारे २.७० लाख रुपयांपर्यंत पोहोचला आहे. सणासुदीचा हंगाम, वाढती मागणी आणि जागतिक अस्थिरता यामुळे दोन्ही मौल्यवान धातूंमध्ये चढ-उतार कायम आहेत. तज्ज्ञांच्या मते, आगामी काळातही बाजारात अस्थिरता राहण्याची शक्यता असून गुंतवणूकदारांनी सावध पावले उचलण्याचा सल्ला दिला जात आहे. एकीकडे खरेदीची परंपरा आणि दुसरीकडे वाढते दर—या दोन्हींच्या कात्रीत अडकलेला ग्राहक सध्या ‘सोनं घ्यायचं की सोडायचं?’ या द्विधा मनःस्थितीत सापडलेला दिसतो आहे.