✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २० एप्रिल २०२६ ।। SGB Redemption Price: सोन्यात गुंतवणूक करणाऱ्यांसाठी भारतीय रिझर्व्ह बँकेने अक्षरशः सोन्यावर सुगंध असा निर्णय जाहीर केला आहे. सॉवरेन गोल्ड बॉण्ड (SGB) 2020-21 सिरीज VII मध्ये गुंतवणूक केलेल्या लोकांसाठी आता प्री-मॅच्युअर रिडेम्प्शनची संधी उपलब्ध झाली असून, त्यातून तब्बल तिप्पट परतावा मिळणार आहे. 20 एप्रिल 2026 रोजी RBIने जारी केलेल्या अधिसूचनेनुसार, ऑक्टोबर 2020 मध्ये प्रति युनिट 5,051 रुपयांना घेतलेला हा बॉण्ड आता 15,254 रुपयांना परत केला जाणार आहे. म्हणजेच केवळ साडेपाच वर्षांत 202 टक्क्यांहून अधिक परतावा मिळत आहे. ज्यांनी त्या काळात संयमाने ही गुंतवणूक केली, त्यांच्यासाठी ही अक्षरशः आर्थिक लॉटरीच ठरली आहे.
या परताव्याचे वैशिष्ट्य म्हणजे केवळ सोन्याच्या वाढलेल्या किमतीचा फायदा नाही, तर त्यासोबत दरवर्षी 2.5 टक्के निश्चित व्याजाचाही लाभ गुंतवणूकदारांना मिळाला आहे. हे व्याज सहामाही पद्धतीने खात्यात जमा होत राहते. म्हणजे एका बाजूला सोन्याच्या भाववाढीमुळे मूळ गुंतवणूक तिप्पट झाली आणि दुसऱ्या बाजूला साडेपाच वर्षे नियमित व्याजही मिळाले. त्यामुळे SGB हा केवळ सुरक्षित नव्हे, तर दुहेरी फायद्याचा गुंतवणुकीचा पर्याय ठरला आहे. RBIच्या नियमानुसार रिडेम्प्शन किंमत India Bullion and Jewellers Association (IBJA) कडून जाहीर होणाऱ्या 999 शुद्धतेच्या सोन्याच्या मागील तीन कामकाजाच्या दिवसांच्या सरासरी क्लोजिंग प्राइसवर ठरवली जाते. त्यानुसारच 15,254 रुपयांची किंमत निश्चित करण्यात आली आहे.
सॉवरेन गोल्ड बॉण्डची एकूण मुदत आठ वर्षांची असते, मात्र सरकार गुंतवणूकदारांना पाच वर्षांनंतर प्री-मॅच्युअर रिडेम्प्शनची सुविधा देते. म्हणजे पूर्ण मुदत संपण्याची वाट न पाहता गुंतवणूकदारांना लिक्विडिटीचा पर्याय मिळतो. कराच्या दृष्टीनेही हा पर्याय आकर्षक आहे. जर गुंतवणूकदारांनी SGB मुदतपूर्तीपर्यंत ठेवला, तर कॅपिटल गेन पूर्णपणे करमुक्त असतो. 12 महिन्यांपेक्षा जास्त काळ ठेवल्यास विक्रीवरील नफ्यावर 12.5 टक्के कर लागू होतो, तर कमी कालावधीत विक्री केल्यास सामान्य आयकर स्लॅबनुसार कर आकारला जातो. मात्र, व्याजावर आयकर लागू राहतो. म्हणूनच सुरक्षितता, स्थिर परतावा, करसवलत आणि सोन्याची हमी—या चौघांच्या संगमामुळे SGB पुन्हा एकदा गुंतवणूकदारांच्या चर्चेचा केंद्रबिंदू ठरला आहे.