✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २१ एप्रिल २०२६ ।। पुण्यात घर घेणाऱ्या सर्वसामान्यांचा एकच अनुभव—फ्लॅट बुक करताना बिल्डर मोठमोठी आश्वासने देतो, ताब्याची तारीख सांगतो आणि नंतर सुरू होते ‘तारीख पे तारीख’ची अखंड मालिका. दोन-तीन वर्षे वाट पाहूनही घराचा ताबा मिळत नाही, हा अनेकांचा कटू अनुभव आहे. अशा परिस्थितीत चौदा मजली इमारत अवघ्या ९५ दिवसांत उभी राहिली, असे कोणी सांगितले तर ते एखाद्या सिनेमातील दृश्य वाटावे! पण पुणे महानगर प्रदेश विकास प्राधिकरणाने (PMRDA) हे अशक्यप्राय स्वप्न वास्तवात उतरवले आहे. चिखली येथील ‘सेक्टर १२’ गृहनिर्माण प्रकल्पात अवघ्या ९५ दिवसांत १४ मजली इमारत उभारून पीएमआरडीएने केवळ विक्रमच केला नाही, तर संपूर्ण बांधकाम क्षेत्रालाच नवा मापदंड दिला आहे.
या अभूतपूर्व कामगिरीची दखल थेट ‘आशिया बुक ऑफ रेकॉर्ड्स’ आणि ‘इंडिया बुक ऑफ रेकॉर्ड्स’ने घेतली असून, सुवर्णाक्षरांनी या विक्रमाची नोंद झाली आहे. विशेष म्हणजे, पीएमआरडीएने यापूर्वी स्वतःच १०० दिवसांत इमारत उभारण्याचा विक्रम केला होता; पण आता त्याच विक्रमाला मागे टाकत ९५ दिवसांचा नवा इतिहास रचला आहे. यापूर्वी ‘एल अँड टी’सारख्या दिग्गज कंपनीच्या नावावर ९६ दिवसांत १२ मजली इमारत उभारल्याची नोंद होती. आता पुण्याने तीही मर्यादा ओलांडली आहे. सोमवारी आयोजित विशेष समारंभात ‘आशिया बुक ऑफ रेकॉर्ड्स’चे परीक्षक अशोक अदाक यांनी अधिकृत प्रमाणपत्र आणि पदक देऊन पीएमआरडीएचा गौरव केला. मुख्य अभियंता रिनाज पठाण यांनी हा सन्मान स्वीकारला.
या विक्रमामागे केवळ वेग नव्हता, तर अत्याधुनिक तंत्रज्ञानाची ताकदही होती. ‘बी. जी. शिर्के कन्स्ट्रक्शन टेक्नॉलॉजी’च्या सुमारे ९ हजार कामगारांनी तीन शिफ्टमध्ये दिवस-रात्र मेहनत घेतली. ‘प्रीकास्ट RCC’ तंत्रज्ञान आणि ‘3S System’—Safety, Strength and Speed—यामुळे गुणवत्तेशी कोणतीही तडजोड न करता ही इमारत विक्रमी वेळेत उभी राहिली. ही इमारत पूर्णपणे भूकंपप्रतिरोधक असून शाश्वत नागरी विकासाचे आदर्श उदाहरण मानली जात आहे. हा प्रकल्प केवळ विक्रमापुरता मर्यादित नसून भविष्यातील परवडणाऱ्या गृहनिर्माणासाठी एक स्केलेबल मॉडेल ठरणार आहे. सर्वसामान्यांना वेळेत, सुरक्षित आणि गुणवत्तापूर्ण घर मिळावे—यासाठीच ही धडपड असल्याचे पीएमआरडीएने स्पष्ट केले आहे. पुण्याने यावेळी फक्त इमारत उभारली नाही, तर विश्वासाचाही एक नवा पाया रचला आहे.