महाराष्ट्र २४ ।। ऑनलाईन ।। विशेष प्रतिनिधी ।। दि. २९ एप्रिल २०२६ ।। लग्नसराईच्या तोंडावर सोन्या-चांदीच्या किमतीत मोठी घसरण झाल्याने बाजारात खरेदीदारांना दिलासा मिळाला आहे. India Bullion and Jewellers Association (IBJA) च्या ताज्या दरांनुसार, २४ कॅरेट सोन्याचा भाव तब्बल १,६२९ रुपयांनी घसरून १,४९,५५७ रुपये प्रति १० ग्रॅमवर आला आहे. चांदीच्या दरात तर आणखी मोठी घसरण पाहायला मिळाली असून ती ५,३८१ रुपयांनी कमी होऊन २,३८,३३९ रुपये प्रति किलोवर पोहोचली आहे. अचानक झालेल्या या घसरणीमुळे “आता नाही तर कधी?” असा सवाल ग्राहकांमध्ये चर्चेत आला आहे.
सोन्याच्या विविध कॅरेटमध्येही घसरण स्पष्ट दिसते. २२ कॅरेट सोनं १,३६,९९४ रुपये (जीएसटी वगळून) इतकं खाली आलं असून जीएसटीसह हा दर सुमारे १,४१,१०३ रुपये आहे. १८ कॅरेट सोन्याचा भावही कमी होऊन १,१२,१६८ रुपयांवर आला आहे. तसेच २३ कॅरेट सोनं १,४८,९५८ रुपये, तर १४ कॅरेट सोनं ८७,४९१ रुपये प्रति १० ग्रॅमवर घसरलं आहे. म्हणजेच सर्व स्तरांवर सोन्याच्या किमतीत ‘स्लाइड’ दिसत असून, खरेदीसाठी अनुकूल वातावरण तयार झालं आहे.
विशेष म्हणजे, सोनं अजूनही त्याच्या उच्चांकापेक्षा खूप खाली आहे. १,७६,१२१ रुपयांच्या ऑल टाइम हाईच्या तुलनेत सध्या सोनं तब्बल २६ हजारांहून अधिक स्वस्त आहे. चांदीतही मोठी घसरण दिसून येते. त्यामुळे गुंतवणूकदार आणि दागिने खरेदी करणाऱ्यांसाठी ही संधी फायदेशीर ठरू शकते. मात्र बाजारातील चढ-उतार लक्षात घेता तज्ञ “घाईपेक्षा योग्य वेळ साधा” असा सल्ला देत आहेत.