महाराष्ट्र २४ ।। ऑनलाईन ।। विशेष प्रतिनिधी ।। दि. २९ एप्रिल २०२६ ।। उन्हाळी सुट्ट्यांचा हंगाम सुरू होताच कोकणाकडे जाणाऱ्या प्रवाशांची लगबग वाढते आणि रेल्वे तिकिटांसाठी झुंबड उडते. अशा वेळी Konkan Railway मार्गावरून एक दिलासादायक बातमी समोर आली आहे. वाढती गर्दी लक्षात घेऊन १ मेपासून विशेष मेमू ट्रेन सुरू करण्यात येणार असून ही सेवा ७ जूनपर्यंत चालणार आहे. विशेष म्हणजे ही गाडी मुख्यतः वीकेंडला धावणार असल्याने सुट्टीत गावी जाणाऱ्यांना मोठा फायदा होणार आहे.
दिवा ते Chiplun दरम्यान धावणारी ही अनारक्षित मेमू ट्रेन (क्रमांक ०११५९/०११६०) शुक्रवार, शनिवार आणि रविवार अशा आठवड्यातील तीन दिवस प्रवाशांच्या सेवेत असेल. चिपळूणहून दुपारी ३.३० वाजता सुटणारी गाडी रात्री ११.१० वाजता दिवा येथे पोहोचेल, तर दिवाहून रात्री ११.२५ वाजता सुटून सकाळी ६.३० वाजता चिपळूण गाठेल. या कालावधीत एकूण ३६ फेऱ्या नियोजित करण्यात आल्या असून, प्रत्येक वीकेंडला प्रवाशांसाठी अतिरिक्त पर्याय उपलब्ध होणार आहे.
ही आठ डब्यांची मेमू ट्रेन अंजनी, खेड, माणगाव, रोहा, पेण, पनवेलसह अनेक स्थानकांवर थांबणार आहे. कोकणात जाणाऱ्या नियमित गाड्यांमध्ये प्रचंड प्रतीक्षा यादी असते, त्यामुळे ही अनारक्षित सेवा प्रवाशांसाठी मोठा दिलासा ठरणार आहे. “तिकीट नाही म्हणून प्रवास रद्द” ही वेळ टाळण्यासाठी ही ट्रेन अनेकांसाठी खऱ्या अर्थाने ‘लाईफलाईन’ ठरण्याची शक्यता व्यक्त होत आहे.