मुंबई, ठाणे, रायगडला ऑरेंज अलर्ट; मुसळधार सरींसह ताशी ६० किमी वेगाने वाऱ्याची शक्यता
महाराष्ट्र २४ ।। ऑनलाईन ।। विशेष प्रतिनिधी ।। दि. २१ जुलै २०२६ ।। मुंबईसह राज्यातील अनेक भागांत पुन्हा एकदा पावसाने जोर धरला असून पुढील ४८ तास अतिमुसळधार पावसाचा इशारा भारतीय हवामान विभागाने (IMD) दिला आहे. गेल्या काही दिवसांपासून अधूनमधून कोसळणाऱ्या सरींनंतर आता मुंबई महानगर प्रदेशात (MMR) पावसाचा जोर वाढण्याची शक्यता व्यक्त करण्यात आली आहे. त्यामुळे नागरिकांनी आवश्यक ती खबरदारी घ्यावी, असे आवाहन प्रशासनाकडून करण्यात आले आहे.
हवामान विभागाच्या नव्या अंदाजानुसार २० जुलै रोजी मुंबई, ठाणे, पालघर आणि रायगड जिल्ह्यांसाठी यलो अलर्ट जारी करण्यात आला आहे. या काळात ताशी ५० ते ६० किलोमीटर वेगाने वारे वाहण्याची शक्यता असून मध्यम ते जोरदार पावसाचा अंदाज आहे. तर २१ जुलै रोजी मुंबई, ठाणे आणि रायगड जिल्ह्यांसाठी ऑरेंज अलर्ट घोषित करण्यात आला आहे. या भागांत काही ठिकाणी अतिमुसळधार पाऊस कोसळण्याची शक्यता असल्याने स्थानिक प्रशासन सतर्क झाले आहे.
आयएमडीच्या माहितीनुसार, ऑरेंज अलर्टच्या कालावधीत २४ तासांत सुमारे ११५.६ ते २०४.४ मिमी पावसाची नोंद होऊ शकते. २२ जुलै रोजी मुंबई, ठाणे आणि पालघर जिल्ह्यांसाठी पुन्हा यलो अलर्ट देण्यात आला असून हलका ते मध्यम पाऊस आणि जोरदार वाऱ्यांचा अंदाज व्यक्त करण्यात आला आहे. मात्र रायगड जिल्ह्यासाठी ऑरेंज अलर्ट कायम ठेवण्यात आला असून तेथे मुसळधार पावसाची शक्यता अधिक असल्याचे हवामान विभागाने स्पष्ट केले आहे.
दरम्यान, या पावसामुळे मुंबईला पाणीपुरवठा करणाऱ्या सातही जलाशयांतील पाणीसाठ्यात वाढ झाली आहे. अधिकृत आकडेवारीनुसार, जलाशयांतील एकूण साठा ५४.०५ टक्क्यांवर पोहोचला असून, १९ ते २० जुलै या २४ तासांत त्यात १.६६ टक्क्यांची वाढ झाली आहे. आगामी दोन दिवसांत पावसाचा जोर कायम राहिल्यास जलाशयांतील साठ्यात आणखी वाढ होण्याची शक्यता असून, दुसरीकडे सखल भाग, नदीकाठची गावे आणि किनारपट्टी परिसरातील नागरिकांनी हवामान विभागाच्या सूचनांचे पालन करण्याचे आवाहन प्रशासनाने केले आहे.
https://x.com/netwadhuri/status/2079114011011080269?ref_src=twsrc%5Etfw%7Ctwcamp%5Etweetembed%7Ctwterm%5E2079114011011080269%7Ctwgr%5Eb42f9461da37a1e1a026ddc52593e44df9de6243%7Ctwcon%5Es1_&ref_url=https%3A%2F%2Fwww.esakal.com%2Fmumbai%2Fmeteorological-department-issue-orange-alert-of-rain-in-mumbai-thane-palghar-and-raigad-on-21st-july-maharashtra-weather-update-mvk02