निरंकारी इन्स्टिट्यूट ऑफ म्युझिक अँड आर्टच्या कार्यक्रमात विद्यार्थ्यांसह कलाकारांचे सुरेल सादरीकरण; गुणवंत विद्यार्थ्यांचा सन्मान
महाराष्ट्र २४ ।। ऑनलाईन ।। विशेष प्रतिनिधी ।। दि. ४ ऑक्टोबर २०२६ ।। भोसरी : भक्तीला शब्दांची गरज नसते; एखादा निर्मळ सूरही मनाच्या दारावर टकटक करून जातो. अशाच सुरांनी भोसरीतील संत निरंकारी सत्संग भवन, दिघी रोड येथे ‘स्वरभक्ती – एक सुरेल भक्ती संध्या’ रंगली. सद्गुरू माता सुदीक्षा जी महाराज यांच्या कृपाशीर्वादाने संत निरंकारी चॅरिटेबल फाउंडेशन अंतर्गत संचालित निरंकारी इन्स्टिट्यूट ऑफ म्युझिक अँड आर्टतर्फे शनिवार, ३ ऑक्टोबर रोजी सायंकाळी ५ ते ८ या वेळेत हा कार्यक्रम झाला. विद्यार्थ्यांसह विविध कलाकारांनी गायन आणि वाद्यवृंदातून सादरीकरण करत वातावरण भक्तिमय केले. संगीताच्या सुरांतून भक्ती, प्रेम, शांती आणि मानवी मूल्यांचा संदेश देण्यात आला. कार्यक्रमाला उपस्थित श्रद्धाळू, पालक आणि संगीतप्रेमींनी कलाकारांच्या सादरीकरणाला उत्स्फूर्त दाद दिली.
बाबा हरदेव सिंह जी महाराज यांच्या संकल्पनेतून २०१५ मध्ये निरंकारी इन्स्टिट्यूट ऑफ म्युझिक अँड आर्टची सुरुवात झाली. संस्थेच्या माध्यमातून संगीत व कलेला शिस्तबद्ध प्रशिक्षणाची जोड देण्याचा प्रयत्न केला जातो. संत निरंकारी चॅरिटेबल फाउंडेशनच्या माहितीनुसार, संस्थेचे प्रशिक्षण केंद्र संगीत आणि कलाक्षेत्रातील विद्यार्थ्यांना व्यासपीठ देण्याच्या उद्देशाने कार्यरत आहेत. पिंपरी-चिंचवडमधील रूपीनगर शाखेत गेल्या वर्षभरापासून संगीत प्रशिक्षण सुरू असून अनेक विद्यार्थी नियमितपणे सराव करीत आहेत. या प्रशिक्षणातून विद्यार्थ्यांच्या कलागुणांना वाव मिळण्याबरोबरच एकाग्रता, शिस्त आणि भारतीय संगीत परंपरेविषयीची आवड विकसित होत असल्याचे आयोजकांनी सांगितले. ‘स्वरभक्ती’मध्ये संगीताच्या परीक्षेत यशस्वी ठरलेल्या विद्यार्थ्यांचा मान्यवरांच्या हस्ते सन्मानचिन्ह व प्रमाणपत्र देऊन गौरव करण्यात आला.
कार्यक्रमाला निरंकारी इन्स्टिट्यूट ऑफ म्युझिक अँड आर्ट, दिल्लीचे प्राचार्य डॉ. विनोद गंधर्व जी यांची प्रमुख उपस्थिती लाभली. विद्यार्थ्यांच्या प्रतिभेला योग्य दिशा देऊन त्यांना व्यासपीठ उपलब्ध करून देण्याच्या प्रयत्नांचे त्यांनी कौतुक केले. संगीत हे केवळ कानाला गोड वाटणारे स्वरांचे खेळणे नसून मनाला शिस्त लावणारे आणि माणसाला माणसाशी जोडणारे माध्यम आहे, हा संदेश कार्यक्रमातून अधोरेखित झाला. संगीत, कला, आध्यात्मिक चेतना, प्रेम, शांती, सद्भावना आणि मानवी मूल्यांचा प्रसार हा या उपक्रमामागील उद्देश असल्याचे आयोजकांनी स्पष्ट केले. कार्यक्रमाच्या यशस्वी आयोजनासाठी विविध सेवांमध्ये योगदान देणाऱ्यांचे कौतुक करण्यात आले. समारोपप्रसंगी पुणे झोनचे झोनल इंचार्ज अशोक आहुजा यांनी मान्यवर, कलाकार, विद्यार्थी, पालक आणि सहकार्य करणाऱ्या सर्वांचे आभार मानले. 