सकाळ-सायंकाळ दीड किलोमीटरच्या रांगा; रुंदीकरण, वाहतूक बेट आणि तीन पर्यायी मार्गांचा प्रस्ताव
महाराष्ट्र २४ ।। ऑनलाईन ।। विशेष प्रतिनिधी ।। दि. ६ ऑक्टोबर २०२६ ।। पुणे : पाषाण चौकात वाहतूक कोंडी आता अपघाताने होणारी घटना राहिलेली नसून रोजच्या प्रवासाचा अविभाज्य भाग बनली आहे. सकाळी आणि सायंकाळच्या गर्दीच्या वेळी वाहनांच्या रांगा तब्बल एक ते दीड किलोमीटरपर्यंत पोहोचत असल्याने नागरिक, विद्यार्थी आणि नोकरदारांचे वेळापत्रक कोलमडत आहे. या कोंडीवर उपाय म्हणून पाषाण गावातील छत्रपती शिवाजी महाराज चौकाचे रुंदीकरण, ग्रेड सेपरेटर आणि वाहतूक बेट उभारण्याचा प्रस्ताव पुढे आला आहे. नगरसेविका मयुरी कोकाटे आणि रत्नमाला सातव यांनी पुणे महापालिकेच्या स्थायी समितीकडे याबाबत प्रस्ताव सादर केला आहे. १८ सप्टेंबरला प्रकल्प प्रमुख दिनकर गोजारे, पथ विभागप्रमुख राजेश बनकर आणि अधीक्षक अभियंता रमेश वाघमारे यांच्यासह संयुक्त पाहणी करण्यात आली. त्यानंतर वाहतूक व्यवस्थेत तातडीने बदल करण्याची गरज अधोरेखित झाली.
प्रस्तावातील सर्वांत महत्त्वाचा मुद्दा म्हणजे संरक्षण विभाग आणि DRDOच्या जागेचा वापर करण्यासाठी आवश्यक संमती मिळवून ग्रेड सेपरेटर उभारणे. चौक रुंद केल्यास आणि वाहतूक बेट विकसित केल्यास एकाच ठिकाणी एकवटणाऱ्या वाहनांचा ताण कमी होऊ शकतो, असा प्रस्तावकांचा दावा आहे. त्याचबरोबर निम्हण मळामार्गे सोमेश्वरवाडीला जोडणारा पर्यायी रस्ता विकसित करण्याचे नियोजन आहे. सुस आणि बावधन परिसरातील वाढती वस्ती आणि वाहनसंख्या पाषाणच्या अरुंद रस्त्यांवर अतिरिक्त भार टाकत असल्याचे स्थानिक पातळीवरील अहवालांतून स्पष्ट होते. मात्र ग्रेड सेपरेटर म्हणजे जादूची कांडी नव्हे. त्यासाठी जमीन, निधी, तांत्रिक आराखडा आणि जोडरस्त्यांची क्षमता यांचा मेळ बसवावा लागणार आहे. सध्या या कामांचा अंतिम आराखडा किंवा प्रत्यक्ष बांधकाम सुरू झाल्याची माहिती उपलब्ध नाही.
कोंडी फोडण्यासाठी प्रस्तावित दुसरा महत्त्वाचा मार्ग म्हणजे निम्हण मळा ते सुस रोडला जोडणारा २४ मीटर रुंदीचा विकास आराखड्यातील रस्ता आणि त्यावरील राम नदीच्या पुलाचे प्रलंबित काम. हे मार्ग कार्यान्वित झाल्यास पाषाण चौकाकडे येणाऱ्या वाहतुकीचा काही भार दुसऱ्या मार्गावर वळवता येईल. त्यासाठी DRDO आणि संरक्षण विभागाच्या आवश्यक जमिनीबाबत प्रक्रिया वेगाने करावी, बाधित नागरिकांना विश्वासात घेऊन योग्य मोबदला द्यावा आणि २०२६-२७च्या महापालिका अंदाजपत्रकात निधीची तरतूद करावी, अशी मागणी करण्यात आली आहे. पाषाणच्या नागरिकांना आता प्रस्तावांची मिरवणूक नको; प्रत्यक्ष कामाची सुरुवात हवी आहे. कारण कोंडीत उभ्या असलेल्या वाहनांना आश्वासनांच्या रस्त्यावरून पुढे जाता येत नाही.