१७ ऑक्टोबरपासून जड वाहनांना विविध ठिकाणी प्रवेशबंदी; सातारा, मुंबई, सोलापूर आणि सासवडकडून येणाऱ्या वाहनचालकांनी पर्यायी मार्ग वापरण्याचे आवाहन
महाराष्ट्र २४ ।। ऑनलाईन ।। विशेष प्रतिनिधी ।। पुण्यात मेट्रोचे जाळे विस्तारत असताना कात्रज चौकातील वाहतुकीचा गुंता आणखी वाढण्याची शक्यता आहे. स्वारगेट ते कात्रज भूमिगत मेट्रो मार्गावरील कात्रज स्थानकाच्या कामासाठी शनिवार, १७ ऑक्टोबरपासून वाहतुकीत प्रायोगिक तत्त्वावर बदल करण्यात आले आहेत. वाहतूक शाखेचे पोलीस उपायुक्त डॉ. संदीप भाजीभाकरे यांनी यासंदर्भात परिपत्रक जारी केले आहे. त्यानुसार सातारा, मुंबई, सोलापूर आणि सासवडकडून कात्रज चौकाकडे येणाऱ्या जड वाहनांना वेगवेगळ्या ठिकाणी प्रवेशबंदी असेल. साताऱ्याकडून जुन्या बोगद्याने येणाऱ्या वाहनांना शिंदेवाडी पुलाजवळ, तर नव्या बोगद्याने येणाऱ्या वाहनांना नवले पुलाजवळ रोखले जाईल. मुंबईकडून वारजेमार्गे येणाऱ्या जड वाहनांनाही नवले पुलाच्या पुढे जाता येणार नाही. सोलापूर आणि सासवडकडून मंतरवाडीमार्गे येणाऱ्या वाहनांना मंतरवाडी चौकात, तर बोपदेव घाटाकडून येणाऱ्यांना खडी मशिन चौकात प्रवेशबंदी असेल. मेट्रोचे काम शहराच्या भविष्यातील वाहतुकीसाठी महत्त्वाचे असले, तरी त्याचा तातडीचा फटका रोजच्या प्रवाशांना बसणार आहे. कात्रज चौक आधीच वाहनांच्या गर्दीने त्रस्त असताना बांधकाम आणि वाहतूक नियोजन यांचा मेळ घालणे प्रशासनासाठी मोठी कसोटी ठरणार आहे.
वाहनचालकांनी नवले पूल–नवीन कात्रज बोगदा–खेड शिवापूर–सासवड लिंक रस्ता–वडकी–मंतरवाडी हा पर्यायी मार्ग वापरावा. दुसऱ्या पर्यायात नवले पूल–नवीन कात्रज बोगदा–खेड शिवापूर–सासवड लिंक रस्ता–गरदे–भिवरी–बोपदेव घाट–येवलेवाडी–पिसोळी–मंतरवाडी असा मार्ग सुचवण्यात आला आहे. मुंबईकडून येणाऱ्या खासगी आणि एसटी बसेसना नवले पुलाजवळ प्रवेशबंदी असेल. साताऱ्याकडून येणाऱ्या बसेसनी नवले पुलाखालून उजवीकडे वळावे. वंडरसिटी ते कात्रज बायपास, मोरेबाग आणि जुना बोगदा मार्गावर दोन्ही बाजूंना ‘नो पार्किंग’ लागू असेल.
प्रवाशांनी प्रवासासाठी अतिरिक्त वेळ राखून ठेवावा, वाहतूक पोलिसांच्या सूचनांचे पालन करावे आणि गर्दीच्या वेळी कात्रज चौकातून जाण्याऐवजी पर्यायी मार्गांचा वापर करावा. मेट्रोचे काम वेळेत पूर्ण होणे जितके महत्त्वाचे, तितकेच काम सुरू असताना नागरिकांचा प्रवास सुरक्षित आणि शक्य तितका सुरळीत ठेवणेही प्रशासनाचे कर्तव्य आहे.