दुधानंतर दही आणि लस्सीलाही महागाईचा फटका; १४ नोव्हेंबरपासून नवे दर लागू, घरखर्चाचे गणित पुन्हा बिघडले
महाराष्ट्र २४ ।। ऑनलाईन ।। विशेष प्रतिनिधी ।। दिवाळीचा फराळ संपला, आता रोजच्या जेवणातील दहीही महाग झाले! गुजरात को-ऑपरेटिव्ह मिल्क मार्केटिंग फेडरेशनच्या (GCMMF) अमूलने दही आणि लस्सीच्या किमती वाढविल्याने सर्वसामान्य ग्राहकांच्या खिशाला आणखी कात्री लागणार आहे. १४ नोव्हेंबर २०२६ पासून नवे दर लागू झाले आहेत. अमूल मस्ती दह्याच्या एक किलोच्या पॅकेटची किंमत ८० रुपयांवरून ८५ रुपये करण्यात आली आहे. म्हणजेच प्रत्येक किलोमागे पाच रुपयांचा अतिरिक्त भार. ३८० ग्रॅमच्या दह्याच्या पॅकेटसाठी आता ३५ ऐवजी ३७ रुपये मोजावे लागतील. एक किलोच्या दह्याच्या बकेटची किंमतही ११५ रुपयांवरून १२० रुपये झाली आहे. दही हा केवळ एखाद्या खास प्रसंगाचा पदार्थ नसून अनेक घरांतील रोजच्या जेवणाचा भाग आहे. त्यामुळे ही वाढ छोटी वाटली तरी नियमित खरेदी करणाऱ्या कुटुंबांच्या मासिक खर्चात तिची भर पडणार आहे.
दह्याबरोबरच अमूल रोज लस्सीच्या दरातही दोन रुपयांची वाढ करण्यात आली आहे. आतापर्यंत १५ रुपयांना मिळणारे लस्सीचे पॅकेट आता १७ रुपयांना विकले जाणार आहे. म्हणजेच एका पॅकेटमागे सुमारे १३ टक्क्यांहून अधिक दरवाढ झाली आहे. विशेष म्हणजे, या दरवाढीपूर्वीच अमूलने १२ नोव्हेंबरपासून ताज्या पॅकेटबंद दुधाचे दर प्रतिलिटर दोन ते चार रुपयांनी वाढवले होते. अमूल ताजाच्या दरात दोन रुपये, तर अमूल गोल्डच्या दरात चार रुपयांची वाढ झाली. त्याआधी २ नोव्हेंबरपासून तूप आणि बटरचे दरही वाढवण्यात आले होते. एक किलो अमूल तुपाच्या पॅकची किंमत ६३० रुपयांवरून ६८० रुपये, तर ५०० ग्रॅम बटरची किंमत ३१० रुपयांवरून ३२५ रुपये झाली. अशा प्रकारे दूध, तूप, बटर, दही आणि लस्सी या दैनंदिन वापरातील पदार्थांच्या किमती वाढल्याने ग्राहकांच्या बजेटवर एकाच वेळी अनेक बाजूंनी दबाव निर्माण झाला आहे.
अमूलची उत्पादने देशभरात मोठ्या प्रमाणावर वापरली जातात. गुजरात को-ऑपरेटिव्ह मिल्क मार्केटिंग फेडरेशनच्या म्हणण्यानुसार, चारा, पशुखाद्य, पॅकेजिंग साहित्य आणि इंधन वाहतुकीचा खर्च वाढल्याने दूध उत्पादन व प्रक्रिया महागली आहे. दूधदरवाढीमागे उत्पादक शेतकऱ्यांना अधिक मोबदला देण्याचाही मुद्दा कंपनीने मांडला आहे. मात्र, खर्च वाढला की त्याचा भार ग्राहकांवर टाकणे आणि ग्राहकांनी तो निमूटपणे सहन करणे, हेच आता महागाईचे रोजचे गणित झाले आहे. सहकारी संस्थेचा उद्देश शेतकऱ्यांना न्याय्य मोबदला देण्याचा असला, तरी ग्राहकांची क्रयशक्ती आणि परवडणारी किंमत यांचाही विचार होणे गरजेचे आहे. दोन रुपयांची लस्सीवाढ किंवा पाच रुपयांची दहीवाढ स्वतंत्रपणे किरकोळ वाटेल; पण अशा छोट्या वाढींची बेरीज महिन्याच्या अखेरीस मोठी होते.