महाराष्ट्र २४ – ऑनलाईन – विशेष प्रतिनिधी – १२ जानेवारी – ‘राजकीय प्रवेशाबाबत आपण घेतलेल्या निर्णयावर फेरविचार करण्याचा आग्रह धरून कोणतेही कार्यक्रम आयोजित करू नयेत आणि आपल्याला आणखी दुखावू नये,’ असे आवाहन ज्येष्ठ अभिनेते रजनीकांत यांनी चाहत्यांना सोमवारी केले. ‘मी माझे स्थान याआधीच ओळखले आहे,’ असेही ते म्हणाले.
राजकारणात प्रवेश न करण्याचा घेतलेला निर्णय त्यांनी मागे घ्यावा, यासाठी त्यांच्या चाहत्यांनी आंदोलन केल्यानंतर दुसऱ्याच दिवशी रजनीकांत यांनी त्यांच्या चाहत्यांना हे आवाहन केले आहे. आपल्या ट्विटर हँडलवर पोस्ट केलेल्या निवेदनात त्यांनी म्हटले आहे, ‘मी राजकारणात दाखल व्हावे यासाठी कार्यक्रम आयोजित करून मला अधिकाधिक दुःखी करू नका.
रविवारी हा कार्यक्रम रजनी मक्कल मंद्राम या राजकीय मंचामधून काढून टाकलेले काही पदाधिकारी आणि सदस्यांच्या पुढाकाराने आयोजित करण्यात आला होता. हा मंच त्यांच्या राजकीय पक्षस्थापनेच्या चर्चेदरम्यान पक्षपूर्व संघटना मानली जात होती.
येथील वल्लुवर कोट्टम येथे कार्यक्रम आयोजित करताना शिस्तीचे पालन केल्याबद्दल आयोजकांचे कौतुक करताना त्यांनी श्रेष्ठींच्या आदेशाचा भंग केल्याबद्दल रोष व्यक्त केला. या कार्यक्रमात भाग न घेणाऱ्या ‘आरएमएम’ सदस्यांचे त्यांनी मनापासून आभार व्यक्त केले.
तमिळनाडूमध्ये आपण नवीन पक्षाची सुरू करणार असल्याची तसेच विधानसभेची निवडणूक लढवणार असल्याची घोषणा केल्यानंतर काही दिवसांतच रजनीकांत यांची प्रकृती बिघडली. त्यानंतर त्यांनी राजकारणात प्रवेश करणार नसल्याचे जाहीर केले होते आणि तामिळनाडूची जनता व ‘आरएमएम’ सदस्यांची माफी मागितली होती.