रुग्ण आणि नातेवाईक यांच्यातील ताण कमी करण्यासाठी सेवाभावी संस्थांनी द्यावे योगदान -पालकमंत्री अशोकराव चव्हाण

रेमडेसिव्हिरबाबत आरोग्य मंत्र्याशी चर्चा पालकमंत्र्यांनी केली जंबो कोविड सेंटरची पाहणी

महाराष्ट्र २४ । ऑनलाईन । विशेष प्रतिनिधी । नांदेड जिल्हा प्रतिनिधी:संजीवकुमार गायकवाड । दि.१६ एप्रिल। पालकमंत्री अशोकराव चव्हाण यांनी आज येथील भक्ती लॉन्समध्ये युद्धपातळीवर उभारण्यात येत असलेल्या जंबो कोविड सेंटरची प्रत्यक्ष पाहणी करुन याठिकाणी आवश्यक त्या ऑक्सिजन व इतर वैद्यकीय व्यवस्थेची पाहणी केली.यावेळी त्यांच्यासमवेत जिल्हा परिषदेच्या अध्यक्षा सौ.मंगाराणी अंबुलगेकर,महापौर मोहिनी येवनकर,आमदार अमर राजूरकर,आमदार बालाजी कल्याणकर,आमदार मोहन हंबर्डे,जिल्हाधिकारी डॉ.विपीन इटनकर,मनपा आयुक्त डॉ. सुनिल लहाने,स्थायी समितीचे सभापती विरेंद्रसिंग गाडीवाले आदी उपस्थित होते.

जिल्ह्यातील कोरोनाचा प्रादुर्भाव लक्षात घेता वैद्यकिय सेवा सुविधा आवश्यक जरी असल्या तरी याचा आणखी प्रादुर्भाव वाढणार नाही यासाठी व्यापक प्रमाणात जनजागृती गरजेची आहे. कोरोनाबाधित रुग्ण आणि त्यांचे नातेवाईक यांच्यामध्ये मोठा मानसिक तणाव निर्माण झाल्याचे आपण पाहतो. या तणावातून असख्यं नातेवाईक कोरोनाच्या वार्डात स्वत:च्या आरोग्याकडे दुर्लक्ष करुन वावरतांना दिसत आहेत.यातून बाधित होणाऱ्यांचे प्रमाणही अधिक आहे. नातेवाईक आणि रुग्ण यांच्यात विश्वासात्मक समन्वय साधण्यासाठी सेवाभावी संस्था, सामाजिक कार्यकर्ते यांनी योगदान द्यावे असे आवाहन पालकमंत्री अशोकराव चव्हाण यांनी केले.पुढील तीन दिवसांत हे सेंटर रूग्णसेवेत रुजू होणार असल्याची माहिती त्यांनी दिली.

सुमारे २०० खाटांच्या या जंबो कोविड सेंटरमध्ये ऑक्सिजन तसेच बायपेप व्हेंटिलेटरची सुविधा उपलब्ध असणार आहे. दरम्यान,यावेळी जिल्हाधिकारी, इतर प्रमुख अधिकारी व लोकप्रतिनिधींशी पालकमंत्री अशोक चव्हाण यांनी कोरोना परिस्थितीवर चर्चा केली.त्यानंतर त्यांनी तात्काळ आरोग्य मंत्री राजेश टोपे यांना दूरध्वनी करून नांदेड जिल्ह्याला अधिक प्रमाणात रेमडेसिविरच्या पुरवठ्याची आवश्यकता असल्याचे सांगितले.टोपे यांनीही या मागणीला सकारात्मक प्रतिसाद दिला. यासंदर्भात सार्वजनिक आरोग्य विभाग प्रयत्नशील असल्याचे ते पालकमंत्र्यांना म्हणाले.