महाराष्ट्र २४ । विशेष प्रतिनिधी । दि . १ जानेवारी । इंधन भडक्यात व्यवसायिकांना होरपळून काढणारा १९ किलोचा एलपीजी सिलिंडर आज १ जानेवारी २०२२ रोजी १०२ रुपयांनी स्वस्त झाला आहे. घरगुती वापराच्या एलपीजी सिलिंडरच्या किमती स्थिर आहेत. आज नवीन वर्षाच्या पहिल्याच दिवशी सिलिंडरच्या किमतीत कपात झाल्याने छोट्या व्यावसायिकांना दिलासा मिळाला.
पेट्रोलियम कंपन्यांनी आज शनिवारी सिलिंडरच्या किमतींचा आढावा घेतला. त्यानुसार १९ किलोच्या वाणिज्य वापराच्या एलपीजी सिलिंडरच्या किमतीत १०२ रुपयांची कपात करण्यात आली आहे. त्यानुसार मुंबईत आता १९ किलो सिलिंडरचा भाव १९४८.५० रुपये इतका झाला आहे. दिल्लीत तो १९९८.५० रुपये इतका झाला आहे. चेन्नईमध्ये १९ किलोच्या गॅससाठी २१३१ रुपये आणि कोलकात्यात २०७६ रुपये दर असेल , असे इंडियन ऑइल कॉर्पोरेशनने म्हटलं आहे.
यापूर्वी सलग दोन महिने १९ किलोच्या सिलिंडरच्या किंमतीत मोठी वाढ झाली होती. नोव्हेंबर महिन्यात वाणिज्य वापराच्या सिलिंडरच्या किमतीत तब्बल २६६ रुपयांची वाढ करण्यात आली होती. तर १ डिसेंबर रोजी घेण्यात आलेल्या आढाव्यात हा सिलिंडर आणखी १०० रुपयांनी सिलिंडर महागला होता. आता पुढील इंधन दर आढावा १ फेब्रुवारी २०२२ रोजी घेतला जाईल.
दरम्यान, सलग तिसऱ्या महिन्यात घरगुती वापराच्या सिलिंडरचा भाव स्थिर ठेवण्यात आला आहे. आज १ जानेवारी २०२२ रोजी घरगुती वापराच्या १४.२ किलोच्या एलपीजी सिलिंडरच्या किमतीत कोणताही बदल करण्यात आलेला नाही. आज घरगुती सिलिंडरचा दर डिसेंबर २०२१ नुसार स्थिर आहे. मुंबई आणि दिल्लीत १४.२ किलो सिलिंडरचा दर ९०० रुपये आहे. कोलकात्यात ९२६ रुपये आणि चेन्नईत ९१६ रुपये दर आहे.
आज १ जानेवारी २०२२ पासून १९ किलो आणि १४.२ किलोचे एलपीजी सिलिंडरचे दर
शहर १९ किलोचा सिलिंडर १४.२ किलोचा सिलिंडर
मुंबई १९४८.५० रु. ९०० रु.
दिल्ली १९९८.५० रु. ९०० रु.
चेन्नई २१३१.०० रु. ९१६ रु.
कोलकाता २०७६.०० रु. ९२६ रु.