महाराष्ट्र २४ ऑनलाईन ,पुणे – एकीकडे जगभर कोरोनाची दहशत असताना दुसरीकडे पुणे महापालिकेच्या डॉ. नायडू सांसर्गिक रुग्णालयात 24 तासांत 5 जण कोरोनामुक्त झाले आहेत, अशी माहिती महापौर मुरलीधर मोहोळ यांनी दिली. तसेच 48 तासांत शहराच्या हद्दीत एकाही कोरोनाग्रस्त रुग्णाची भर पडली नाही, असंही माहिती मोहोळ यांनी दिली आहे. त्यामुळे पुणेकरांसाठी ही एक दिलासादायक बातमी आहे. कोरोनाला मुळापासून नष्ट करण्यासाठी संपूर्ण देश लॉकडाऊन करण्यात आला आहे. प्रत्येकाने या नियमांचं पालन केलं तर त्याचा मोठा फायदा जनतेला होऊ शकतो.
या संदर्भात महापौर मोहोळ म्हणाले की, ‘कोरोनाचं संकट मोठं असलं तरी त्यावर मात करता येत आहे, हा विश्वास महत्वाचा आहे. यासाठी महापालिकेची आरोग्ययंत्रणा अहोरात्र कष्ट घेत असून योग्य समन्वय आम्ही ठेवला आहे. कोरोनामुक्त होता येत असले तरी नागरिकांनी काळजी घेणं आवश्यकच आहे’
महाराष्ट्रातील पहिलं कोरोनाग्रस्त दाम्पत्य यांच्यासह दाम्पत्याची मुलगी, दाम्पत्याला मुंबईहून घेऊन येणारा कॅब चालक आणि दुबई ट्रिपमधीलसह एक प्रवासी यांचा यात समावेश आहे. यातील दाम्पत्याचे दुसरे निगेटिव्ह रिपोर्ट मंगळवारी रात्री उशिरा तर उरलेल्या तिघांचे निगेटिव्ह रिपोर्ट बुधवारी संध्याकाळी आले आहेत. त्यांचे रिपोर्ट निगेटिव्ह आले असून ते आता ठणठणीत बरे झाले असल्याचं सांगण्यात येत आहे.