महाराष्ट्र २४ । विशेष प्रतिनिधी । दि. ३ जून । दिल्ली उच्च न्यायालयाने विमानतळांवर आणि उड्डाणांवेळी मास्क सक्तीची कडक अंमलबजावणी करण्याचं आवाहन केलं आहे. प्रभारी मुख्य न्यायमूर्ती (ACJ) विपिन संघी यांच्या नेतृत्वाखालील खंडपीठाने सांगितले की, विमानतळांवर आणि विमानात मास्क न घालणाऱ्यांना मोठा दंड ठोठावण्यात यावा. ‘नियमांची अंमलबजावणी झाली पाहिजे. आवश्यकता भासल्यास उल्लंघन करणार्‍यांना विमानातून बाहेर काढून टाकावे’, असंही खंडपीठानं म्हटलं आहे.
आदेशात म्हटले आहे की, ‘प्रत्यक्ष अंमलबजावणी प्रभावी आहे की नाही याची खात्री करणे आवश्यक आहे. यासाठी DGCA ने मास्क आणि हातांच्या स्वच्छतेच्या नियमांचे उल्लंघन करणार्‍या प्रवाशांवर कठोर कारवाई करण्यासाठी विमानतळ, उड्डाणे, कॅप्टन, पायलट इत्यादी कर्मचार्‍यांना अधिकृत करणारी स्वतंत्र बंधनकारक मार्गदर्शक तत्त्वे जारी करावीत. अशा व्यक्तींवर गुन्हा दाखल करून दंड ठोठावण्यात यावा आणि त्यांना नो-फ्लाय लिस्टमध्ये टाकण्यात यावे.’
उड्डाणांवेळी आणि विमानतळांवर कोविड नियमांचे उल्लंघन केल्याबद्दल दिल्ली उच्च न्यायालयात जनहित याचिका दाखल केल्यानंतर हे आदेश देण्यात आले आहे.
ACJ ने सांगितले की मास्क अनिवार्य करण्यामागे कोविडचा धोका कमी करण्याचा उद्देश आहे. ‘काहीही खाताना तुम्ही तुमचा मास्क काढून ठेवू शकता. उड्डाणांवेळी मास्कची आवश्यकता आधीपासूनच नियमांमध्ये आहे’, असं ACJ म्हणाले.
दिल्ली हायकोर्टानं डीजीसीएला विमान आणि विमानतळांवर नियमांच्या कठोर अंमलबजावणीसाठी मार्गदर्शक तत्त्वं तयार करण्यास सांगितलं आहे.