महाराष्ट्र २४ । विशेष प्रतिनिधी । दि.१८ जून । पुण्यातील शार्प शूटर संतोष जाधव याने सिद्धू मुसेवाला यांच्या हत्येतील सहभाग नाकारला आहे. पुणे पोलिसांच्या चौकशीत जाधव म्हणाला की, ज्या दिवशी मुसेवाला मारला गेला, त्या दिवशी मी गुजरातमध्ये होतो. जाधव याला पुणे पोलिसांनी गुजरातमधील कच्छ येथून या हत्या प्रकरणात अटक केली होती.
मात्र, जाधव याच्या दाव्यात किती तथ्य आहे? पुणे पोलीस तपासासाठी गुजरातमध्ये पोहोचले आहेत. पुणे पोलिसांनी या संदर्भातील माहिती पंजाब पोलिसांनाही दिली आहे.
दिल्ली आणि पुणे पोलिसांनी शार्प शूटर सिद्धेश हिरामणी कांबळे उर्फ सौरव महाकाळ याला काही दिवसांपूर्वी पकडले होते. त्याची चौकशी केल्यानंतर दिल्ली पोलिसांनी महाकाल मुसेवालाचा या हत्येत सहभाग नसल्याचा दावा केला होता. मुसेवाला हत्येत संतोष जाधव आणि त्याचा साथीदार नवनाथ सूर्यवंशी यांचा हात असल्याचे महाकालने सांगितल्याचे दिल्ली पोलिसांनी सांगितले होते. मात्र, आता संतोष जाधव याने देखील पाठ फिरवली आहे.
काही दिवसांपूर्वी 8 शार्प शूटर्सची यादी बाहेर आली होती. या सर्वांचा मुसेवाला यांच्या हत्येत सहभाग असल्याचा दावा यात करण्यात आला आहे. ही यादी दिल्ली पोलिसांनी दिली आहे. पंजाब पोलिसांनी या प्रकरणात 4 शार्प शूटर्सची ओळख पटवली असली तरी यामध्ये हरियाणातील सोनीपत येथील प्रियवर्त फौजी आणि अंकित सेरसा, पंजाबच्या अमृतसर येथील रहिवासी जगरूप रूपा आणि मोगा येथील रहिवासी मनू कुस्सा यांचा समावेश आहे. पंजाब पोलीस या चौघांचा शोध घेत आहेत.