महाराष्ट्र २४ । विशेष प्रतिनिधी । दि. १६ जुलै । सामान्यतः तापाच्या उपचारात वापरले जाणारे डोलो-650 हे औषध प्रत्येक घरात उपलब्ध आहे. या औषधाची निर्मिती करणाऱ्या मायक्रो लॅब्सने कोरोनाच्या काळात यातून भरपूर नफा कमावला. पण, आता कंपनीने या औषधाची जाहिरात करण्याऐवजी डॉक्टरांना 1000 कोटींचे फ्रि गिफ्ट दिल्याचे समोर आले आहे.
बिझनेस टुडेवर प्रसिद्ध झालेल्या वृत्तानुसार, 6 जुलै रोजी आयकर पथकाने नऊ राज्यांमध्ये मायक्रो लॅब्स लिमिटेडच्या 36 ठिकाणी छापे टाकले. सीबीडीटीने सांगितले की, कंपनीवर कारवाई केल्यानंतर विभागाने 1.20 कोटी रुपयांची अज्ञात रोख रक्कम आणि 1.40 कोटी रुपयांचे दागिने जप्त केले आहेत.
यासंदर्भात कंपनीला ई-मेलद्वारे विचारणा केली असता, कोणतेही उत्तर मिळाले नाही. सीबीडीटीच्या म्हणण्यानुसार, आयकर छाप्यांमध्ये जप्त करण्यात आलेल्या कागदपत्रांच्या आणि डिजिटल डेटाच्या छाननीमध्ये कंपनीने 1,000 कोटी रुपयांच्या मोफत भेटवस्तू वितरित करण्याचे रहस्य उघड केले आहे. निवेदनात म्हटले आहे की या कागदपत्रांवरून स्पष्टपणे दिसून येते की कंपनीने आपल्या उत्पादनाची जाहिरात करण्यासाठी चुकीचे डावपेच अवलंबले होते.
या औषधाची किंमत कमी असेल, पण त्यातून कमाई करण्यासाठी कंपनीने जो खेळ केला, तो खेळ आज चर्चेचा विषय बनला आहे. कोरोना महामारीच्या काळात या औषधाच्या विक्रीत एवढी उसळी होती की ते बाजारातून गायब झाले होते. 2020 मध्ये, कोविड-19 ची प्रकरणे समोर आल्यानंतर, 350 कोटी गोळ्या विकल्या गेल्या आणि एका वर्षात कंपनीला सुमारे 400 कोटी रुपये मिळाले.
सीबीडीटीच्या निवेदनात या समूहाची ओळख उघड करण्यात आली नसली तरी, सूत्रांच्या हवाल्याने अहवालाने पुष्टी केली आहे की ती मायक्रो लॅब्स लिमिटेड आहे. CBDT नुसार, तपासादरम्यान आणखी अनेक आर्थिक अनियमितता आढळून आल्या आहेत. कोरोनाच्या काळात, हे वेदनशामक (वेदना कमी करणारे) आणि अँटीपायरेटिक (ताप कमी करणारे) औषध डोलो-650 उपचारांमध्ये डॉक्टरांनी सर्वात प्रभावी म्हणून वापरले होते.