महाराष्ट्र २४ । विशेष प्रतिनिधी । दि. २३ जुलै । ‘गृहमंत्रिपद मिळाले तर शिंदे-फडणवीस यांच्या सरकारमध्ये सहभागी होण्याचा विचार करू, पण ते देत नाहीत ना, असा मिश्किल टोला मनसेचे युवानेते अमित ठाकरे यांनी शुक्रवारी लगावला. विद्यार्थी आणि पदाधिकाऱ्यांशी संवाद साधण्यासाठी शुक्रवारी ते अंबरनाथला गेले होते.
राज्यातील सत्तांतरानंतर शिवसेनेचे युवानेते आदित्य ठाकरे आणि मनसे पक्षप्रमुख राज ठाकरे यांचे पुत्र अमित ठाकरे या भावांनी महाराष्ट्रात संवाद दौरे सुरू केले आहेत. शुक्रवारी अमित ठाकरे यांनी दादर ते अंबरनाथ असा लोकलने प्रवास केला. त्यानंतर अंबरनाथ येथील प्राचीन शिव मंदिरात जाऊन दर्शन घेतले.
अंबरनाथ पूर्वेतील रोटरी सभागृह येथे विद्यार्थी तसेच पदाधिकारी यांच्याशी बंददाराआड त्यांनी संवाद साधला. यावेळी पत्रकारांशी अनौपचारिक गप्पा मारताना मनसेला दोन मंत्रिपदे मिळणार असल्याची चर्चा सुरू असल्याबाबत त्यांना प्रश्न विचारला. ‘गृहमंत्री पद देणार असतील तर सत्तेत सहभागी होऊ, पण ते देत नाहीत ना’, असा मिश्किल टोला ठाकरे यांनी यावेळी लगावला. तर यावेळी शालेय आणि महाविद्यालयीन विद्यार्थ्यांच्या समस्या समजून घेत, वर्षानुवर्षे असलेल्या त्या कायम असल्याची नाराजी व्यक्त केली.