महाराष्ट्र २४- ऑनलाईन – लातुर – उदगीर शहरातील एका ७० वर्षीय महिलेचा कोरोना अहवाल पॉझिटिव्ह आला आहे. त्यामुळे उदगीर अक्षरशा हादरली असून सर्वत्र खळबळ पसरली आहे. लातूर जिल्ह्यात स्थानिकांना बाधा नव्हती, मात्र परराज्यातील आठ यात्रेकरू कोरोना बाधित निघाले होते. ते सर्वजण कोरोनामुक्त झाल्याने समाधान मानले जात होते. दरम्यान उदगीरच्या बातमीने चिंता वाढली आहे. उदगीरमध्ये हा पहिलाच रुग्ण आढळला आहे, त्यांचा प्रवास इतिहास काय आहे, तो स्थानिक की बाहेरील याची माहिती प्रशासन घेत आहे.
उदगीरमधील रुग्णाबाबत माहिती कळल्यानंतर राज्यमंत्री संजय बनसोडे यांनी तातडीने आरोग्य यंत्रणेशी संपर्क साधून इतरांना लागण पसरू नये यासाठी काळजी घ्यावी, असे निर्देश दिले आहेत. सदरील रुग्ण महिला असून, ती ७० वर्षांची आहे. अन्य आजारांनी त्रस्त असल्याने ती शुक्रवारी रुग्णालयात आली होती. दरम्यान उदगीरवासीयांनी घाबरून जाऊ नये. प्रशासन खबरदारी घेत आहे. लोकांनी घराबाहेर पडू नये. लॉकडाऊनच्या नियमांचे पालन करावे, सोशल डिस्टन्सच्या नियमाचे पालन करावे असे आवाहन करण्यात आले आहे. सदर महिलेला बाधा कशी झाली, तिचा प्रवास इतिहास आदी तपासून पाहिला जात आहे, तसेच तिच्या संपर्कातील सर्वांना क्वारंटाईन केले जाईल, सांगण्यात येत आहे.
दरम्यान, सदरील महिलेचा संपर्क गुजरातमधून आलेल्या महिलेशी आला होता, अशी प्राथमिक माहिती हाती आली आहे, ही माहिती मिळाल्यानंतर पोलिसांनी ताब्यात घेऊन क्वारंटाईन केले, आरोग्य विभागाने तपासणी करीन घेऊन तपासणी केली असता, त्यात पॉझिटिव्ह अहवाल आला आहे.