महाराष्ट्र २४ । विशेष प्रतिनिधी । २७ नोव्हेंबर । सक्तवसुली संचालनालयाने अर्थात ईडीने केबल व्यावसायिक आणि शिवसेना उद्धव बाळासाहेब ठाकरे या पक्षाचे नेते अनिल परब यांचे जवळचे मित्र सदानंद कदम यांना मनी लॉन्ड्रिंग प्रकरणात समन्स जारी केलं आहे. ईडीने काही महिन्यांपूर्वी रत्नागिरी जिल्ह्यातील दापोली येथे रिसॉर्ट बांधताना पर्यावरण संरक्षण नियमांचे उल्लंघन केल्याप्रकरणी सदानंद कदम आणि अनिल परब यांचे जबाब नोंदवले होते.
काही दिवसांपूर्वीच पोलिसांनी रिसॉर्टच्या बांधकामाशी संबंधित महाराष्ट्र प्रादेशिक आणि नगर नियोजन कायद्यांतर्गत कदम यांच्याविरोधात दुसरा एफआयआर नोंदवला. त्यानंतर ईडीने एफआयआरमध्ये नमूद केलेल्या तपशीलांची तपासणी करण्याचा आणि कदम यांची चौकशी करण्याचा निर्णय घेतला. मे महिन्यात सक्तवसुली संचालनालयाने परब आणि कदम यांच्याविरुद्ध मनी लॉन्ड्रिंगचा गुन्हा दाखल केला होता.
कपिवा गेट स्लिम ज्यूसचे नियमित सेवन वजन कमी करण्यासाठी फायदेशीर.
ईडीने आता सदानंद कदम यांना समन्स पाठवत पुढील आठवड्यात चौकशीसाठी पाचारण केलं आहे. अनिल परब यांनी दापोलीतील रिसॉर्ट स्वस्त दरात कदम यांना विक्री केले. तसंच यामध्ये मोठ्या प्रमाणात गैर व्यवहार झाला, असा संशय ईडीला आहे. त्यामुळे या प्रकरणातील चौकशीत नेमकी काय माहिती समोर येते, हे पाहणं महत्त्वाचं ठरणार आहे.
दरम्यान, दापोली कोर्टाने साई रिसॉर्ट घोटाळ्यासंदर्भात अनिल परबांना समन्स बजावले आहे आणि १४ डिसेंबर रोजी प्रत्यक्ष हजर राहण्याचे आदेश दिले आहेत. पर्यावरण मंत्रालय, भारत सरकारने CRZ मध्ये बांधकाम केल्याप्रकरणी कोर्टात तक्रार दाखल केली होती. तो वेगळा खटला दापोली न्यायालयात सुरू आहे. दापोली तालुक्यातील मुरुडमधील वादग्रस्त साई रिसॉर्टप्रकरणी ही सुनावणी सुरू आहे. काही दिवसांपूर्वी पंचायत समिती गटविकास अधिकारी रुपा दिघे यांनी शासनाची फसवणूक केल्याप्रकरणी भा.द.वि. ४२० नुसार अनिल परब यांच्यासह मुरुड ग्रामपंचायत तत्कालीन सरपंच व तत्कालीन ग्रामसेवक यांच्याविरोधात दापोली पोलीस स्थानकात गुन्हा दाखल केला आहे. अनिल परब यांच्यानंतर सदानंद कदम यांच्याविरोधातही शासनाकडून एफआयआर दाखल करण्यात आल्याने कदम यांच्याही अडचणी वाढण्याची शक्यता आहे.