महाराष्ट्र २४ । विशेष प्रतिनिधी । ५ जानेवारी । शाहरुख खानचा ‘पठाण’ चित्रपट प्रदर्शित व्हायला अवघे दोन आठवडे बाकी आहेत. पण त्यातील ‘बेशरम रंग’ गाण्यापासून सुरू झालेल्या वादानंतर चित्रपटाला अजुनही हिंदू संघटनांच्या रोषाला सामोरं जावं लागत आहे. ‘पठाणला आता गुजरातमधील अहमदाबादमध्ये जोरदार विरोध होत आहे. शहरातील एका मॉलमध्ये बजरंग दलच्या कार्यकर्त्यांनी चित्रपटाचे पोस्टर फाडले आहेत.
‘आज तक’ने दिलेल्या वृत्तानुसार, ४ जानेवारील रोजी अहमदाबादमधील अल्फावन मॉलमध्ये बजरंग दलाच्या कार्यकर्त्यांनी ‘पठाण’ चित्रपटाचा जोरदार विरोध केला. तसेच त्यांनी मॉलमध्ये लावण्यात आलेले शाहरुख खानचे पोस्टर फाडले. बजरंग दलचे कार्यकर्ते चांगलेच आक्रमक झाले होते. त्यांनी मॉलमध्ये ‘पठाण’चे पोस्टर फाडले आणि घोषणाबाजी केली. मॉलमध्येही त्यांनी तोडफोड केली आणि ‘पठाण’ रिलीज न होऊ देण्याचा इशाराही त्यांनी दिला आहे.
या गोंधळावर बजरंग दलाचे अध्यक्ष ज्वलित मेहता यांनी प्रतिक्रिया दिली. “दीपिका पदुकोणने परिधान केलेल्या कपड्यांना आमचा विरोध आहे. ‘पठाण’ हा चित्रपट लव्ह जिहादला प्रोत्साहन देतो. त्यामुळे आम्ही हा चित्रपट प्रदर्शित होऊ देणार नाही,” अशी भूमिका त्यांनी मांडली.या गोंधळानंतर पोलीस तिथे पोहोचले आणि त्यांनी पाच कार्यकर्त्यांना ताब्यात घेतलं होतं, नंतर त्यांना सोडून देण्यात आलं.
#WATCH | Gujarat | Bajrang Dal workers protest against the promotion of Shah Rukh Khan's movie 'Pathaan' at a mall in the Karnavati area of Ahmedabad (04.01)
(Video source: Bajrang Dal Gujarat's Twitter handle) pic.twitter.com/NelX45R9h7
— ANI (@ANI) January 5, 2023
दरम्यान, १२ डिसेंबर रोजी ‘पठाण’ चित्रपटातील ‘बेशरम रंग’ हे पहिलं गाणं प्रदर्शित करण्यात आलं होतं. या गाण्यातील दीपिका पदुकोणच्या भगव्या बिकिनीवरून वाद निर्माण झाला आहे. ‘भगवा’ रंग हे हिंदू धर्माच्या श्रद्धेचं प्रतीक असल्याचं बजरंग दल, हिंदू महासभा अशा अनेक संघटनांचं म्हणणं आहे. दीपिका पदुकोणने भगवी बिकिनी घालून हिंदू धर्माचा अपमान केला आहे, असं ते म्हणत आहेत. यानंतर सेन्सॉर बोर्डानेही या गाण्यात बदल सुचवले होते, पण निर्मात्यांनी त्यावर कोणतीही प्रतिक्रिया दिलेली नाही.