महाराष्ट्र २४ । विशेष प्रतिनिधी । १६ जानेवारी । राष्ट्रवादी काँग्रेसचे नेते अजित पवार हे मोठ्या अपघातातून थोडक्यात बचावले आहेत. स्वत: अजित पवार यांनी त्यांच्यासोबत घडलेल्या या भीषण घटनेबाबतची माहिती दिली आहे. लिफ्टमधून जात असताना लाईट गेले आणि ही लिफ्ट चौथ्या मजल्यावरून थेट खाली आली, असं अजित पवार म्हणाले. काल म्हणजेच 14 जानेवारीला पुण्यात झालेल्या एका कार्यक्रमामध्ये ही घटना घडली.
काय म्हणाले अजित पवार?
‘मी काल कुठे बोललो नव्हतो, पण तुम्ही घरचे आहात म्हणून बोलतो. काल मी हॉस्पिटलचं उद्घाटन केलं. दादा तिसऱ्या मजल्यावर आलात आता चौथ्या मजल्यावर लिफ्टने जाऊ असं ते म्हणाले. मी नको म्हणालो. तरी आम्ही लिफ्टमध्ये बसलो, लिफ्ट वर जाईना, तिथच बंद झाली, मग लाईट गेले. चौथ्या मजल्यावरून लिफ्ट दाणकन खाली आली. आज श्रद्धांजलीचाच कार्यक्रम झाला असता,’ असं अजित पवार म्हणाले. अजित पवारांच्या या विधानानंतर एकच हश्या पिकला.
‘यानंतर दरवाजा तोडण्यात आला, पण मला भीती हर्डीकर डॉक्टरांची होती. याबाबत मी पत्नी आणि आईलाही बोललो नाही. मी पत्रकारांनाही सांगितलं नाही, नाहीतर कालच ब्रेकिंग न्यूज सुरू झाली असती. याबाबत कुणालाही बोलून नका, हे मी यांना सांगितलं होतं,’ अशी प्रतिक्रिया अजित पवार यांनी दिली.