महाराष्ट्र २४ । विशेष प्रतिनिधी । दि. २१ जुलै । गेल्या २८ वर्षांपासून अबाधित असलेल्या भाजपच्या गडाला सुरुंग लावून जाएंट किलर ठरलेले काँग्रेसचे आमदार रवींद्र धंगेकर यांनी मनसे अध्यक्ष राज ठाकरे यांच्यासोबतचा फोटो स्टेटस ठेवल्याने त्यांच्या मनात ‘घरवापसी’ करण्याचा विचार सुरु आहे की काय? अशा चर्चा सुरु झाल्या आहेत. काँग्रेस पक्षाचे आमदार होऊन उणेपुरे पाच महिनेच झालेले असताना धंगेकरांच्या मनात घरवापसीचा विचार सुरु असल्याच्या शक्यतेने त्यांचे कार्यकर्ते मात्र सैरभैर झालेत.
रवींद्र धंगेकर हे पूर्वश्रमीचे मनसेचे कार्यकर्ते आहेत. त्यांनी मनसेकडून २००९ आणि २०१४ साली कसबा पेठ विधानसभेची निवडणूक देखील लढवली होती. त्यामुळे रवींद्र धंगेकर यांचे मनसे पक्षात अतिशय चांगले संबंध आहेत. कसब्यात प्रचार करताना रवींद्र धंगेकर हे मनसेच्या शहर कार्यालयात देखील गेले होते. यावेळी मनसेच्या नेत्यांनी त्यांचं मोठ्या थाटात स्वागत सुद्धा केलं होतं. त्यामुळे राज ठाकरे यांनी भाजपला पाठिंबा दिलेला असताना देखील रवींद्र धंगेकर यांना मनसेचा छुपा पाठिंबा आहे का? अशी चर्चाही त्यावेळी झाली. निवडून आल्यानंतर ५ महिन्यातच त्यांच्या मनसेत जाण्याच्या चर्चांनी काँग्रेसच्या गोटातही अस्वस्थता पसरली आहे.
आमदार झाल्यानंतरही राज ठाकरेंची भेट घेतली होती
कसब्यात भाजपला इंगा दाखवल्यानंतर, आमदार म्हणून निवडून आणल्यानंतर रवींद्र धंगेकर यांनी राज ठाकरे यांची मुंबईत येऊन, त्यांची भेट घेतली होती. यावेळी राज ठाकरे दिलदार मनाचे राजे आहेत, अशी प्रतिक्रिया रवींद्र धंगेकर यांनी दिली होती.
धंगेकर आधी शिवसैनिक, मग मनसैनिक, राज ठाकरेंचे खास होते
बाळासाहेब ठाकरे यांची भाषणं ऐकून आणि त्यांच्या कार्यशैलीने प्रभावित होऊन रवींद्र धंगेकर यांनी शिवसेनेत प्रवेश केला. शिवसेनेचा पदाधिकारी म्हणून काम करताना त्यांनी पुणे शहरात विविध आंदोलने केली. जनसामान्यांच्या प्रश्नांवर आंदोलन करताना त्या आंदोलनाच्या माध्यमातून त्यांना न्याय मिळवून देण्याकरिता धंगेकर झटले. पुढे राज ठाकरे यांच्या बंडानंतर त्यांच्याच मनसे पक्षात धंगेकर दाखल झाले. २००९ आणि २०१४ ची विधानसभा निवडणूक धंगेकरांनी मनसेकडूनच लढवली. दोन्ही वेळेला तिहेरी लढतीमुळे अगदी थोड्या मतांनी धंगेकरांचा पराभव झाला. त्यानंतर पुढे काही वर्षांनी त्यांनी मनसेची साथ सोडून काँग्रेसमध्ये प्रवेश केला.