महाराष्ट्र २४ ।। विशेष प्रतिनिधी ।। दि. २२ ऑगस्ट ।। गेल्या दोन दिवसांपासून पुण्यात स्पर्धा परीक्षा करणारे विद्यार्थी आंदोलन करत होते. त्यामध्ये त्यांच्या अनेक मागण्या होत्या. त्यातील एक प्रमुख मागणी म्हणजे २५ ऑगस्टची महाराष्ट्र राजपत्रित नागरी सेवा संयुक्त पूर्व परीक्षा पुढे ढकलण्याची होती. कारण यादिवशी एमपीएससीची परीक्षा आणि आयबीपीएसची परीक्षा दोन्ही एकाच दिवशी होत्या. त्यामुळे अनेक विद्यार्थ्यांना एका परीक्षेला मुकावे लागणार होते. आता आयोगाने याबद्दलचे नोटिफिकेशन काढून ही परीक्षा पुढे ढकलल्याचे जाहीर केले आहे.
आयोग नोटिफिकेशनमध्ये काय म्हणाले आहे?
महाराष्ट्र लोकसेवा आयोगाची आज सकाळी १० वाजता बैठक झाली. यामध्ये परीक्षा पुढे ढकलण्याचा निर्णय घेण्यात आला. यावेळी आयोग म्हणाले, ‘आज रोजी आयोजित आयोगाच्या बैठकीमध्ये रविवार, दि. 25 ऑगस्ट 2024 रोजी नियोजित महाराष्ट्र राजपत्रित नागरी सेवा संयुक्त पूर्व परीक्षा 2024 पुढे ढकलण्याचा निर्णय घेण्यात आला. परीक्षेचा दिनांक लवकरात लवकर जाहिर करण्यात येईल.’
कृषीच्या जागांबाबत निर्णय नाही-
आंदोलनाला बसलेल्या विद्यार्थ्यांनी कृषीसेवा गट अ आणि ब च्या २५८ जागा राज्यसेवा परीक्षेतून भराव्यात अशीही मागणी केली होती. रात्री आंदोलन सुरू झाल्यानंतर आयोगाने काही वेळात एक परिपत्रक काढले. त्यामध्ये आयोग म्हणाले, ‘महाराष्ट्र कृषि सेवेतील गट अ, गट ब व गट ब (कनिष्ठ) संवर्गातील पदांच्या मागणीपत्रांच्या अनुषंगाने कळविण्यात येते की, प्रस्तुत संवर्गाकरिताची जाहिरात येत्या २-३ दिवसांत प्रसिद्ध करण्यात येईल. तसेच या सेवेतील संवर्गाकरिता पूर्व परीक्षेचे आयोजन ऑक्टोबर २०२४ अखेरपर्यंत करण्यात येईल.’ आता राज्यसेवा पूर्व परीक्षा पुढे ढकलली आहे पण कृषीच्या जागांबाबत कोणताही निर्णय घेण्यात आला नाही.
कर्नाटकनंतर महाराष्ट्र राज्याच्या परीक्षांच्या तारखांतही बदल-
आयबीपीएसची क्लर्कची परीक्षा २५ ऑगस्टला होणार आहे. त्याचे वेळापत्रत जानेवारी महिन्यातच आले होते. विद्यार्थ्यांचे नुकसान होऊ नये म्हणून कर्नाटक राज्य लोकसेवा आयोगाने त्यांची २५ ऑगस्टची नियोजित परीक्षा पुढे ढकलली होती. विद्यार्थ्यांच्या मागणीचा रेटा वाढल्याने तिथल्या आयोगाला राज्य सरकारने ही परीक्षा पुढे ढकलण्याच्या सूचना दिल्या होत्या. आता महाराष्ट्र सरकारच्या निर्देशानंतर महाराष्ट्र लोकसेवा आयोगानेही परीक्षा पुढे ढकलण्याचा निर्णय घेतला आहे.