महाराष्ट्र २४ ।। विशेष प्रतिनिधी ।। दि. २३ ऑगस्ट ।। केंद्रीय कर्मचारी तसेच निवृत्ती वेतनधारक पगार वाढीची आतुरतेने वाट पाहत आहेत. पंतप्रधान नरेंद्र मोदींच्या नेतृत्वाखालील केंद्र सरकार लवकरच लाखो केंद्रीय कर्मचाऱ्यांना सणासुदीच्या काळात मोठी भेट देऊ शकते. अहवालांनुसार मोदी सरकार सणासुदीच्या आधी केंद्रीय कर्मचाऱ्यांचा महागाई भत्ता वाढवणार आहे, ज्यामुळे सरकारी कर्मचाऱ्यांना दरमहा अधिक पैसे मिळतील.
केंद्रीय कर्मचाऱ्यांना DA कधीपर्यंत वाढणार
इकॉनॉमिक टाइम्सच्या (ईटी) अहवालानुसार, केंद्र सरकार लवकरच महागाई भत्त्यात (डीए) लवकरच वाढ करण्याची शक्यता आहे. महागाई भत्ता (DA) सोबत निवृत्ती वेतनधारकांना दिली जाणारी महागाई सवलत (DR) देखील वाढणार आहे. केंद्र सरकारच्या सध्याच्या कर्मचाऱ्यांना डीए वाढीचा लाभ मिळतो त्याचप्रमाणे केंद्र सरकारच्या माजी कर्मचाऱ्यांना म्हणजेच निवृत्ती वेतनधारकांना DR चा लाभ मिळतो.
सातव्या वेतन आयोगाच्या शिफारशींनुसार सरकारी कर्मचाऱ्यांना वर्षातून दोनदा महागाई भत्ता सुधारित केला जातो. महागाई भत्त्यातील पहिला बदल वर्षाच्या पहिल्या महिन्यापासून म्हणजे जानेवारीपासून लागू होतो तर, दुसरा बदल जुलैपासून लागू केला जातो. अशा स्थितीत, जुलै महिना उलटून गेला असून आता ऑगस्टही संपणार आहे त्यामुळे, महागाई भत्त्यात बदल करण्याबाबत सरकार लवकरच निर्णय घेईल, असे अपेक्षित आहे.
केंद्रीय कर्मचाऱ्यांना वाढीव महागाई भत्ता
यापूर्वी मार्च २०२४ मध्ये महागाई भत्ता ४ टक्क्यांनी वाढवण्यात आला होता. होळीपूर्वी केंद्र सरकारने महागाई भत्ता आणि महागाई सवलतीच्या दरात ४-४% वाढ केली ज्यानंतर डीए आणि डीआर ५० टक्क्यांच्या पुढे गेला. मार्चमध्ये जाहीर वाढ जानेवारीपासून लागू करण्यात आली होती.
यावेळी महागाई भत्ता किती वाढणार
सध्याच्या जूनपर्यंतच्या AICPI इंडेक्सनुसार केंद्रीय कर्मचाऱ्यांना जुलैपासून ३ टक्के वाढीव भत्ता मिळण्याची शक्यता असून यासह एकूण महागाई भत्ता ५३ टक्क्यांवर पोहोचले. गेल्या वर्षासाठी औद्योगिक कामगारांसाठी (CPI-IW) सरासरी ग्राहक किंमत निर्देशांक ४००.९० होत ज्यानुसार गणना केल्यानंतर अंदाजे डीए दर ५३.३५% येते. सरकार CPI-IW च्या आधारे महागाई भत्ता आणि महागाई सवलतीचे दर सुधारित करते.