महाराष्ट्र २४ ।। विशेष प्रतिनिधी ।। दि. २७ ऑगस्ट ।। ३१ जुलैच्या आयकर रिटर्नच्या (आयटीआर) अंतिम मुदतीपर्यंत ७ कोटींहून अधिक पगारदार करदात्यांना आयटीआर दाखल केले होते पण काही लोकांच्या रिटर्नवर आयकर विभागाने अद्याप प्रक्रिया केलेली नाही. अशा परिस्थितीत, जर तुमच्या आयटी फॉर्मवरही प्रक्रिया केली गेली नसेल तर आयकर परतावा पैसे तुमच्या बँक खात्यात येणार नाहीत. त्याचवेळी, ३१ जुलैपर्यंत रिटर्न भरणाऱ्या करदात्यांना ITR पडताळणीसाठी फक्त पाचच दिवस शिल्लक असून तुमची आयटीआर पडताळणी (सत्यापित) न झाल्यास परतावा अवैध घोषित केला जाईल.
ITR प्रक्रियेला वेळ का लागतो?
करदात्यांना फाईल केलेल्या आयटीआरवर प्रक्रिया करण्यासाठी कोणतीही निश्चित वेळ मर्यादा नाही कारण प्रत्येक बाबतीत वेळ वेगवेगळी असते. तुमच्या ITR वर प्रक्रिया करण्यासाठी किती वेळ लागेल हे तुम्ही निवडलेल्या फॉर्म, जटिलता आणि सूटच्या दाव्यांवर अवलंबून असते. अहवालानुसार, ज्यांच्या आयटीआरवर प्रक्रिया झालेली नाही त्यांना प्रक्रिया होण्यासाठी १८ ते २० दिवस लागू शकतात पण, साधारणपणे आयकर रिटर्नच्या प्रक्रियेस आयटीआरच्या ई-सत्यापन तारखेपासून सरासरी १५-४५ दिवस लागतात.
प्रक्रियेस जास्त वेळ लागत असल्यास कर एजन्सीने तुमच्या रिटर्नचे परीक्षण केले पाहिजे म्हणजे तुमचे दाखल केलेले रिटर्न प्रक्रिया केल्याशिवाय राहू शकत नाही. नियमांनुसार आयकर रिटर्न भरल्यानंतर आर्थिक वर्ष संपल्याच्या नऊ महिन्यांच्या आत त्यावर प्रक्रिया केली पाहिजे.
ITR प्रोसेस न झाल्यास काय करावे
एखाद्या करदात्याच्या आयकर रिटर्नवर ४५ दिवसांनंतरही प्रक्रिया झाली नसेल तर, इन्कम टॅक्स पोर्टलवर ‘कम्प्लेंट टॅब’ वरून तक्रार दाखल करू शकतात. याशिवाय करदाते हेल्पलाइन नंबरचा वापर करून सेंट्रल प्रोसेसिंग सेंटर (CPC) शी संपर्क साधू शकतात. त्याचवेळी तुम्हाला तुमच्या आयटीआरची स्थिती तपासायची असेल तर यासाठी सर्वप्रथम आयकर विभागाच्या ई-फायलिंग पोर्टलवर जाऊन लॉग इन करा. त्यानंतर “ई-फाईल” विभागावर क्लिक करून प्रोसेसिंग स्टेटसवर क्लिक करा. अशाप्रकारे आता तुम्हाला तुमच्या आयटीआरचे स्टेटस स्पष्ट दिसेल.