महाराष्ट्र २४ ।। विशेष प्रतिनिधी ।। दि. ३० सप्टेंबर ।। राष्ट्रीय व्याघ्र संवर्धन प्रधिकरणाच्या मार्गदर्शक सूचना बघता ताडोबा व्याघ्रप्रकल्पाच्या कोअर झोनमधील पर्यटन १ जुलैपासून बंद करण्यात आले होते. आता पावसाळी सुट्टी संपल्याने येत्या बुधवारपासून ताडोब्याचे सर्व दरवाजे पर्यटकांसाठी उघडण्यात येणार आहेत. पहिल्याच दिवशी कोअरमधील वाघोबांच्या दर्शनासाठी पर्यटकांनी आगाऊ बुकिंग केल्याची माहिती सूत्रांनी दिली आहे. दरम्यान, यंदा मान्सून पर्यटनाला अधिक प्रतिसाद मिळाल्याचे आकडेवारीतून पुढे आले आहे.
जैविक विविधता, नैसर्गिक वारसा लाभलेल्या, घनदाट जंगलांनी व्याप्त असलेल्या ताडोबा-अंधारी व्याघ्रप्रकल्पाला राष्ट्रीयच नव्हे तर आंतरराष्ट्रीय स्तरावर महत्त्वाचे स्थान आहे. या व्याघ्र प्रकल्पाला येणाऱ्या व्याघ्रप्रेमींची संख्याही मोठी आहे. ताडोब्यात बहुतांश रस्ते चांगले असल्याने सफारीला फटका बसत नाही. पण, राष्ट्रीय व्याघ्रसंवर्धन प्रधिकरणाच्या मार्गदर्शक सूचनेनुसार ताडोब्याचा कोअर झोन पावसाळ्यात पूर्णपणे बंद ठेवण्यात येतो.
एक दिवस लांबणीवर
पावसाळी सुट्टी संपल्यानंतर १ ऑक्टोबरला साधारणतःव्याघ्रप्रकल्पांचे दरवाजे उघडण्यात येतात. ताडोब्याला मंगळवारी सुटी राहत असल्याने प्रकल्प बंद असतो. परिणामी यंदा २ ऑक्टोबरला, बुधवारी कोअर झोनमधील दरवाजे उघडले जाणार असल्याची माहिती ताडोब्या व्याघ्र प्रकल्पाच्या अधिकाऱ्यांनी दिली. नवेगाव-नागझिरा लवकरच पावसाळ्याच्या दिवसांत बंद केलेले नवेगाव-नागझिरा व्याघ्र प्रकल्प पर्यटकांसाठी लवकरच खुले करण्यात येणार आहे. यासाठी व्याघ्रप्रकल्पातर्फे ऑनलाइन बुकिंग सुरू केले आहे. नवेगाव-नागझिरा व्याघ्रप्रकल्पाचे सफारी व इतर उपक्रम महाराष्ट्र वनविभागाच्या आरक्षण प्रणालीद्वारे सुरू करण्याबाबत वरिष्ठ कार्यालयाकडून सूचना प्राप्त झाल्या आहेत. त्यानुषंगाने १५ ऑक्टोबर २०२४ ते १५ जून २०२५ पर्यंत महाराष्ट्र वन विभागाच्या http://safaribooking.mahaforest.gov.in या संकेतस्थळावरुन ऑनलाइन प्रणालीद्वारे सफारीचे आरक्षण सुरू करण्यात आले आहे.
मनोज जरांगे रुग्णालयात, प्रताप पाटील चिखलीकरांनी भेट घेत तब्येतीची विचारपूस केली
व्याघ्रपर्यटनात ताडोबा अव्वल
१ मार्च ते ३० जून २०२४ या चार महिन्यांच्या कालावधीत कोअर व बफर झोन मिळून सुमारे ८५ हजारांहून जास्त पर्यटकांनी हजेरी लावली आहे. परिणामी व्याघ्रदर्शनासाठी प्रख्यात असणारा ताडोबा-अंधारी प्रकल्प हा व्याघ्र पर्यटनात राज्यात पुन्हा एकदा अव्वल ठरला आहे. आता दिवाळीत पर्यटकांची धूम दिसणार असल्याचे संकेत आहेत.