महाराष्ट्र २४ ।। विशेष प्रतिनिधी ।। दि. ३ ऑक्टोबर ।। भाजपचे नेते माजी मंत्री हर्षवर्धन पाटील हे राष्ट्रवादी कॉंग्रेस (शरदचंद्र पवार) पक्षात प्रवेश करणार असल्याची चर्चा बऱ्याच दिवसांपासून सुरू आहे. परंतु या चर्चांना आणखी जोर आला आहे. हर्षवर्धन पाटील यांचे पुत्र राजवर्धन पाटील आणि कन्या अंकिता पाटील ठाकरे यांनी आपल्या व्हॉट्सॲप स्टेटसला तुतारीचा फोटो ठेवला आहे. यामुळे हर्षवर्धन पाटलांचा शरद पवार गटात प्रवेश निश्चित असल्याचे बोलले जात आहे. विशेष म्हणजे राजवर्धन पाटील यांनी स्टेटस ठेवल्यामुळे चर्चांना अधिक बळ मिळाले आहे.
जसजशी विधानसभा निवडणूक जवळ येत आहे. तसतसे राज्यातील विविध मतदारसंघांमध्ये अनेक राजकीय घडामोडी घडताना दिसून येत आहे. पुणे जिल्ह्यातील महत्वपूर्ण समजला जाणारा इंदापूर मतदार संघामध्येही मागील काही दिवसांपासून विविध राजकीय घडामोडी घडताना दिसून येत आहे. काही दिवसांपूर्वी मंत्री हर्षवर्धन पाटील यांच्या उपस्थितीत बावडा येथील त्यांच्या निवासस्थानी कार्यकर्ता मेळावा संपन्न झाला होता. यावेळी उपस्थिततांमधून मनोगत व्यक्त करताना ‘राम कृष्ण हरी वाजवा तुतारी’ हा सूर घुमताना दिसून आला. आगामी विधानसभेसाठी इंदापूरच्या विधानसभेच्या उमेदवारीमध्ये विद्यमान आमदार दत्तात्रय भरणे, माजी मंत्री हर्षवर्धन पाटील यांचे नाव चर्चेत आहेत. इंदापूरची जागा अजित पवार यांच्या गटाला जाणार असल्याचे निश्चित झाले आहे. त्यामुळे हर्षवर्धन पाटील तुतारी हाती घेणार असल्याची चर्चा सुरू होती.
यावर भाजपचे प्रदेशाध्यक्ष चंद्रशेखर बावनकुळे यांनी म्हटले होते की, ज्यांना पक्ष सोडून जायचे आहे, त्यांनी खुशाल जावे. पक्ष कोणाला अडवणार नाही. त्यांनी जर विचार केला असेल तर आम्ही त्यांना थांबवू शकत नाही. मात्र, थोडा संयम ठेवला तर पक्ष काहीतरी निर्णय घेईल. यावेळी समरजीत घाटगे व हर्षवर्धन पाटील पक्ष सोडणार असल्याची चर्चा होती. हाच धागा पकडत हर्षवर्धन पाटील म्हणाले होते की, आम्ही कोणतीही चुकीची भूमिका घेतलेली नसताना कोणत्या दृष्टिकोनातून बावनकुळे साहेबांनी वक्तव्य केलं मला माहित नाही. तुम्ही अशी भूमिका घेत असाल तर. इंदापूरच्या सामान्य जनतेच्या भावना दुखावण्याचा अधिकार तुम्हाला कोणीही दिलेला नाही. पुढे जो निर्णय होईल तो होईल. मात्र मी तुम्हाला अभिमानाने सांगतो. हर्षवर्धन पाटील आयुष्यभर सर्व काही सहन करेल मात्र अपमान सहन करणार नाही. असं म्हणाले होते. परंतु आता हर्षवर्धन पाटील तुतारी हातात घेणार असल्याचे निश्चित झाले असल्याचे चर्चा सुरू झाली आहे.