महाराष्ट्र २४ ।। विशेष प्रतिनिधी ।। दि. २४ नोव्हेंबर ।। नवज्योत सिंग सिद्धू यांनी सांगितले की, त्यांची पत्नी आता कॅन्सरमुक्त आहे. कडुलिंब, हळद, लिंबू आणि आवळा यांचा आहारात समावेश करून त्यांच्या पत्नीचा कर्करोग बरा झाला. या घरगुती उपायांनी त्यांच्या पत्नीने कर्करोगावर मात केल्याचा दावा सिद्धूने केला आहे. सिद्धूचे हे वक्तव्य सोशल मीडियावरही चांगलेच व्हायरल होत आहे. यानंतर अनेक कर्करोग रुग्ण त्यांच्या डॉक्टरांना आयुर्वेदाने उपचार सुरू करण्याबाबत विचारत आहेत. दरम्यान, देशातील सर्वात मोठ्या कर्करोग रुग्णालयांपैकी एक असलेल्या टाटा मेमोरियल रुग्णालयाच्या 200 हून अधिक कर्करोग डॉक्टरांनी लोकांना आवाहन करणारे पत्र जारी केले आहे.
या पत्रात डॉक्टरांनी म्हटले आहे की, माजी क्रिकेटरचा व्हिडिओ सोशल मीडियावर व्हायरल होत आहे, ज्यामध्ये तो आपल्या पत्नीच्या स्तनाच्या कर्करोगावरील उपचाराविषयी सांगत आहे. व्हिडिओच्या काही भागांमध्ये असे म्हटले आहे की डेअरी उत्पादने आणि साखर न खाल्ल्याने आणि हळद आणि कडुलिंबाचे सेवन करून कर्करोगाचा उपचार केल्याने त्याचा कर्करोग बरा झाला.
माजी क्रिकेटपटूच्या या दाव्यांबाबत वैद्यकीय शास्त्रात कोणताही पुरावा नसल्याचे डॉक्टरांनी म्हटले आहे. अशा आयुर्वेदिक उपायांवर संशोधन चालू आहे, परंतु हळद किंवा कडुलिंब कर्करोगविरोधी एजंट म्हणून फायदेशीर असल्याचे सूचित करणारा कोणताही डेटा सध्या उपलब्ध नाही. असे दावे खरे मानू नका, असे आवाहन डॉक्टरांनी केले आहे. त्यांना कर्करोगाची लक्षणे आढळल्यास, डॉक्टर आणि कर्करोग विशेषज्ञांचा सल्ला घ्या. वेळीच निदान झाले, तर कर्करोग बरा होऊ शकतो.
फेडरेशन ऑफ ऑल इंडिया मेडिकल असोसिएशनचे (एफएआयएमए) अध्यक्ष डॉ सुवर्णाकर दत्ता म्हणाले की, कर्करोगाच्या उपचाराबाबत चुकीची माहिती घातक ठरू शकते. कडुनिंब आणि हळद यांसारख्या गोष्टींमध्ये कर्करोगविरोधी घटक असतात की नाही यावर संशोधन सुरू आहे. अशा परिस्थितीत, सोशल मीडियावर केल्या जाणाऱ्या दाव्यांना फसवू नका आणि तुमच्या कर्करोगाच्या उपचारांना उशीर करू नका. अप्रमाणित उपचारांमुळे होणारा विलंब रुग्णाच्या जीवावर बेतू शकतो! लोकांनी सोशल मीडियावर न जाता कॅन्सर तज्ज्ञांचा सल्ला घ्यावा, असे आवाहन करण्यात आले आहे.