महाराष्ट्र २४ – ऑनलाईन वृत्तसेवा – विशेष प्रतिनिधी -मुंबई : दि.८ ऑगस्ट – तब्बल 4 दिवस मुंबईसह अनेक उपनगरांना झोडपून काढणाऱ्या पावसाने शुक्रवारपासून मात्र दडी मारली आहे. शुक्रवार सकाळपासून राज्यात पावसाचा जोर ओसरला आहे. मुंबईतल्या अनेक उपनगरांत हलक्या सरी वगळता पाऊस थांबला होता. आजही अनेक ठिकाणी ढगाळ वातावरण आहे. त्यामुळे राज्यात आजही अनेक ठिकाणी सोसाट्याचा वारा आणि मुसळधार पावसाची शक्यता असल्याचं हवामान खात्याकडून सांगण्यात आलं आहे.
8 ऑगस्ट रोजी म्हणजेच आज राज्यात कोकण, गोवा आणि मध्य महाराष्ट्रात तुरळक ठिकाणी मुसळधार पाऊस पडले. महाराष्ट्राच्या किनारी भागात सोसाट्याचा वारा राहिल. त्यामुळे समुद्रकिनारी जाण्यावर बंदी घालण्यात आली आहे. 9 ऑगस्टला वातावरण ढगाळ राहिल. तर राज्यभर हलक्या स्वरुपाचा पाऊस होईल असा अंदाज हवामान खात्याकडून वर्तवण्यात आला आहे.
दरम्यान, गेल्या 4 दिवसांत पावसाने मुंबईची तुंबई केली होती. राज्यभर मुसळधार पावसाने जनजीवन विस्कळीत झालं होतं. अशात शुक्रवारी पावसाने विश्रांती घेतली असली तरी असाच मुसळधार पाऊस मुंबईत पुन्हा 11 ऑगस्टला होणार असल्याचा अंदाज हवामान खात्याकडून वर्तवण्यात आला आहे.