महाराष्ट्र २४ ।। विशेष प्रतिनिधी ।। दि.२१ डिसेंबर ।। भारताचा माजी क्रिकेटपटू रॉबिन उथप्पा ( Robin Uthappa ) याच्याविरोधात अटक वॉरंट जारी करण्यात आले आहे. कर्मचारी भविष्य निर्वाह निधी (EPF) योगदानात फसवणूक केल्याचा आरोप उथप्पा यांच्यावर आहे. रॉबिन उथप्पा हा सेंचुरीज लाइफस्टाइल ब्रँड प्रायव्हेट लिमिटेड कंपनीचे शेअरहोल्डर आहे. दरम्‍यान, या प्रकरणी रॉबिन उथप्पा याने कोणताही खुलासा केलेला नाही.
प्रादेशिक भविष्य निर्वाह निधी आयुक्त षडाक्षरा गोपाल रेड्डी यांनी उथप्पा विरोधात अटक वॉरंट जारी केले आहे. या प्रकरणी उथप्पा विरोधात हा गुन्हा चार डिसेंबर रोजी दाखल करण्यात आला होता. कंपनीकडून दरमहा पीएफचे पैसे कापले जात असले तरी ते त्यांच्या पीएफ खात्यात जमा होत नसल्याचा आरोप कंपनीच्या कर्मचाऱ्यांनी केला आहे. ही संपूर्ण रक्कम 23 लाख रुपये असल्याचे सांगण्यात येत आहे. उथप्पावर फसवणुकीचा गुन्हा दाखल करण्यात आला आहे.
उथप्पाची क्रिकेट कारकीर्द
उथप्पाने २०२२ मध्ये सर्व प्रकारच्या क्रिकेटमधून निवृत्ती घेतली होती. उथप्पाने भारतासाठी ४६ वनडे आणि १३ टी-20 सामने खेळले आहेत. उथप्पा 2007 टी-20 विश्वचषक विजेत्या संघाचा सदस्य होता. तसेच आयपीएलमध्ये उथप्पा कोलकाता नाईट रायडर्स, रॉयल चॅलेंजर्स बंगलोर आणि मुंबई इंडियन्स या संघांसाठी खेळला. तो 2014 मध्ये केकेआरच्या विजयी संघाचा भाग होता आणि त्याच्या आक्रमक फलंदाजीच्या शैलीसाठी ओळखला जात होता.