महाराष्ट्र २४ ।। विशेष प्रतिनिधी ।। दि.२७ डिसेंबर ।। मस्साजोगचे सरपंच संतोष देशमुख यांच्या निर्घृण हत्येनंतर मंत्री धनंजय मुंडे यांना सातत्यानं लक्ष्य करणाऱ्या भाजप आमदार सुरेश धस यांनी आज जिल्ह्याच्या पोलीस अधीक्षकांची भेट घेतली. यावेळी त्यांनी पोलीस अधीक्षकांकडे विविध मुद्दे उपस्थित केले. महादेव बेटिंग ऍपच्या माध्यमातून जिल्ह्यात मोठे आर्थिक व्यवहार झाल्याचा आरोप त्यांनी केला. त्याच्या चौकशीची मागणी धस यांनी केली.
‘माझ्या मतदारसंघाच्या टोकाला असलेल्या टेंभुर्णी गावातील एका व्यक्तीच्या खात्यातून ९ अब्ज रुपयांचा व्यवहार झाला. साधारणत: १०० कोटी रुपयांपेक्षा अधिकचे व्यवहार असल्यास ईडीकडून चौकशी होते. इथे ९०० कोटी रुपयांचं प्रकरण आहे. त्यामुळे त्याची ईडी चौकशी व्हायला हवी होती. या प्रकरणात दोन पोलीस अधिकारी होते. त्यांची नावं मी पोलीस अधीक्षकांना सांगितली आहेत. या ठिकाणी चांगलं कामं करणाऱ्या अधिकाऱ्यांना बाजूला सारण्यात आलं. प्रकरणाचे धागेदोरे मलेशियापर्यंत पोहोचलेले आहेत. महादेव बेटिंग ऍप प्रकरणातसुद्धा आकाचा हात असावा,’ असा संशय आमदार धस यांनी व्यक्त केला.
‘बीडमध्ये गँग ऑफ वासेपूर झालं आहे. बीडजवळ कोणी जमिनी घेतल्या त्याचे तपशील पुढे येत आहेत. परळी बाजार समितीनं गाळे बांधले. तीन वर्षांपासून त्यांचं उद्घाटन झालेलं नाही. कारण ते गाळे गायरान जमिनीवर उभारले आहेत. चौदाशे एकरच्या आसपास गायरान जमीन आकाच्या कार्यकर्त्यांनी बळकावली आहे. तिथे एकूण सहाशे वीटभट्ट्या आहेत. त्यातल्या तीनशे वीटभट्टी अनधिकृत आहेत. आकांचे असे उद्योग आता हळूहळू पुढे येऊ लागले आहेत,’ अशा शब्दांत धस यांनी आकांची कुंडलीच मांडली.
‘मला घेरण्याचा प्रयत्न होतोय, असं ते (धनंजय मुंडे) म्हणतात. धनुभाऊ आपलं विमान खाली आणा.. तुम्हाला पालकमंत्री व्हायचं आहे. आमचं लेकरु गेलं आहे. त्याला न्याय द्यायचा आहे. तुला कोणी घेरलंय? हा काही राजकीय विषय नाही. या मोर्चात वंजारी समाजाचे लोक सहभागी होणार आहेत. मुस्लिम लोक सहभागी होणार आहेत,’ असं म्हणत धस यांनी मुंडेंना प्रत्युत्तर दिलं.