महाराष्ट्र २४ ।। विशेष प्रतिनिधी ।। रविवार दि. २३ मार्च ।। परिवहन विभागाने एक जानेवारी २०२५पासून जुन्या वाहनांसाठी ‘एचएसआरपी’ बसवण्याचे काम सुरू केले आहे. मात्र, अपेक्षेप्रमाणे ‘एचएसआरपी’ बसवण्याचे प्रमाण कमी असल्याचे निदर्शनास आले आहे. काही जिल्ह्यांमध्ये ‘फिटमेंट सेंटर’ची संख्या कमी असल्याने वाहनधारकांना अपॉइंटमेंट घेण्यासही अडचणी येत आहेत. परिणामी, अनेक वाहनधारकांना प्रतीक्षा करावी लागत आहे. या पार्श्वभूमीवर, सर्व प्रादेशिक व उप प्रादेशिक परिवहन अधिकाऱ्यांना आपल्या कार्यक्षेत्रातील ‘फिटमेंट सेंटर्स’चा आढावा घेऊन, आवश्यकता असल्यास नवीन केंद्रे सुरू करण्याच्या सूचना परिवहन आयुक्तांनी दिल्या आहेत. मोटार वाहन निरीक्षकांमार्फत या केंद्रांची तपासणी करून त्यास मंजुरी देण्याचे आदेशही देण्यात आले आहेत.
‘एका ठिकाणी किमान २५ किंवा त्याहून अधिक वाहनांना उच्च सुरक्षा नोंदणी क्रमांक पाटी (हाय सिक्युरिटी रजिस्ट्रेशन नंबरप्लेट) बसवण्यासाठी नोंदणी झाली असल्यास तेथील वाहनांना नंबरप्लेट लावण्यासाठी कोणतेही अतिरिक्त होम फिटमेंट शुल्क आकारू नये,’ असा आदेश परिवहन आयुक्तालयाने दिला आहे. या निर्णयामुळे वाहनधारकांना दिलासा मिळणार आहे.
काही सूचना नव्याने
राज्यात एक एप्रिल २०१९पूर्वी नोंदणी झालेल्या वाहनांसाठी उच्चसुरक्षा नोंदणी क्रमांक पाटी (हाय सिक्युरिटी रजिस्ट्रेशन नंबरप्लेट) बसवण्याच्या प्रक्रियेला गती देण्यासाठी परिवहन विभागाने नव्याने काही सूचना काढल्या आहेत. वाहन संघटनांनी नवी नंबरप्लेट बसवण्यासाठी प्रोत्साहन द्यावे, अशी सूचना परिवहन विभागाने राज्यातील बस, रिक्षा, टॅक्सी, ट्रक संघटनांच्या पदाधिकाऱ्यांना केली आहे.
शुल्काबाबत नाराजी
दुचाकी वाहनांसाठी घरी जाऊन नंबरप्लेट बसवण्यासाठी १२५ रुपये, तर चारचाकी वाहनांसाठी २५० रुपये शुल्क ‘होम डिलिव्हरी’ म्हणून आकारण्यात येते. याबाबत नागरिकांकडून नाराजी व्यक्त केली जात होती. एका ठिकाणी किमान २५ किंवा त्याहून अधिक वाहनधारकांनी ‘एचएसआरपी’ बसवण्यासाठी अर्ज केल्यास, त्यांच्या सोयीच्या ठिकाणी किंवा गृहनिर्माण सोसायटीमध्ये एजन्सीद्वारे कोणतेही अतिरिक्त होम फिटमेंट शुल्क न आकारता ‘एचएसआरपी’ बसवण्यात येईल.
परिवहन विभागाने एक जानेवारी २०२५पासून जुन्या वाहनांसाठी ‘एचएसआरपी’ बसवण्याचे काम सुरू केले आहे. मात्र, अपेक्षेप्रमाणे ‘एचएसआरपी’ बसवण्याचे प्रमाण कमी असल्याचे निदर्शनास आले आहे. काही जिल्ह्यांमध्ये ‘फिटमेंट सेंटर’ची संख्या कमी असल्याने वाहनधारकांना अपॉइंटमेंट घेण्यासही अडचणी येत आहेत. परिणामी, अनेक वाहनधारकांना प्रतीक्षा करावी लागत आहे. या पार्श्वभूमीवर, सर्व प्रादेशिक व उप प्रादेशिक परिवहन अधिकाऱ्यांना आपल्या कार्यक्षेत्रातील ‘फिटमेंट सेंटर्स’चा आढावा घेऊन, आवश्यकता असल्यास नवीन केंद्रे सुरू करण्याच्या सूचना परिवहन आयुक्तांनी दिल्या आहेत. मोटार वाहन निरीक्षकांमार्फत या केंद्रांची तपासणी करून त्यास मंजुरी देण्याचे आदेशही देण्यात आले आहेत.