महाराष्ट्र २४ ।। विशेष प्रतिनिधी ।। दि. ८ एप्रिल ।। १९६० च्या दशकात मुंबई आणि गोवा दरम्यान दोन स्टीमर्सनी लोकांना नेण्याची सुरुवात केली होती. परंतु भारतातील प्रमुख पर्यटनस्थळ असलेल्या गोव्यासाठी नियमित रो-रो फेरी सेवेसाठी अद्याप पर्यटक प्रतिक्षेतच आहेत. आता महाराष्ट्राचे परिवहन मंत्री प्रताप सरनाईक यांनी स्वतः याबाबतीत दखल घेतली आहे. जर सर्व काही व्यवस्थित झाले तर मुंबई-गोवा महामार्ग सुरु होण्याची वाट पाहणाऱ्या लोकांना एक मोठी भेट मिळणार आहे. लोकांना फक्त ६ तासांत मुंबईहून गोवा गाठता येऊ शकणार आहे. हा प्रकल्प दोन्ही राज्यांच्या पर्यटनासाठी फायदेशीर ठरणार आहे.
मुंबई आणि ठाणे सारख्या शहरांत केबल टॅक्सीसारख्या वाहतुकीच्या नवीन प्रयोगावर सरनाईकांनी विशेष काम केले आहे. आता ते म्हणाले की, ते मुंबई ते गोवा रो-रो सेवा सुरू करण्याचा प्रयत्न करीत आहेत. सरनाईक यांचे हे विधान अशा वेळी आले आहे जेव्हा केंद्रीय मंत्री नितीन गडकरी यांनीही मुंबई महानगर (एमएमआर) प्रदेशात जलवाहतुक सुरु करण्याची घोषणा केली होती. कारण या प्रदेशात एका बाजूला खाडी आहे. दुसऱ्या बाजूला समुद्र आहे. येथे १५-२० जेट्टींचे कामही पूर्णत्वास आले आहे. या सफल प्रकल्पांनंतर, मीरा-भाईंदर ते वसई-विरार अशी रो-रो सेवाही सुरू झाली आहे. आता सरनाईक म्हणाले आहेत की, मुंबई ते गोवा रो-रो सेवा लवकरच सुरू करण्यासाठी प्रयत्न सुरू आहेत.
मुंबई आणि गोव्यामधील प्रवासाचे तास कमी कऱण्यासाठी आणि जलद कनेक्टिव्हिटीसाठी आणि मुंबई आणि गोवा दरम्यान एक महामार्ग बांधला जात आहे. परंतु त्याचे पूर्ण होण्यास आणखी वेळ लागणार आहे. या मार्गावरील गाड्या बऱ्याचदा भरुन जातात. शिवाय, विमानाचे तिकीटही महाग आहे. अशा परिस्थितीत जर मुंबई-गोवा जलमार्ग वाहतुकीसाठी खुला झाला तर तो गेमचेंजर ठरू शकेल, असे तज्ज्ञांचे मत आहे. सध्या, मुंबई ते अलिबाग अशी रो-रो सेवा सुरू आहे. ज्यामध्ये बोटीद्वारे वाहनांची वाहतूक करण्याची सुविधा देखील उपलब्ध आहे. मुंबई ते अलिबाग प्रवास करणाऱ्या लोकांसाठी हा रो-रो फायदेशीर ठरत आहे. जर मुंबई आणि गोवा दरम्यान रो-रो फेरी सेवा सुरू झाली तर दोन्ही ठिकाणांना पर्यटनाचा मोठा फायदा होऊ शकतो. रो-रो फेरी सेवेला हिरवा कंदील देण्यापूर्वी सरकारला सुरक्षा मानकांबाबत पडताळणी करावी लागणार आहे.
