महाराष्ट्र २४ ।। विशेष प्रतिनिधी ।। दि. ८ एप्रिल ।। अमेरिकेचे राष्ट्राध्यक्ष डोनाल्ड ट्रम्प यांच्या आयात शुल्कासंदर्भातील निर्णयानंतर जगभरातील शेअर बाजारावर याचे परिणाम होताना दिसले. इतकंच नव्हे, तर भारतीय शेअर बाजारातही मोठी पडझड झाली. अनेक गुंतवणुकदारांना याचा फटका बसला. इथं हे चित्र असतानाच सामान्यांच्या आर्थिक गणितावर परिणाम करणारी आणखी एक महत्त्वाची बातमी समोर आली, ती म्हणजे एलपीजी सिलेंडरमधील दरवाढीबाबतची.
नव्यानं लागू झालेल्या दरांनुसार 8 एप्रिलपासून ग्राहकांना 14.2 किलो वजनाच्या एलपीजी गॅस सिलेंडरसाठी जास्तीचे 50 रुपये मोजावे लागणार आहेत. या दरवाढीनंतर राजधानी दिल्लीमध्ये सिलेंडरचे दर 803 रुपयांवरून थेट 853 रुपयांवर पोहोचले आहेत. केंद्रीय मंत्री हरदीप सिंह पुरी यांनी यासंदर्भातील घोषणा करत घरगुती वापरातील सिलेंडरच्या दरात वाढ झाल्याचं जाहीर केलं.
उज्ज्वला आणि सामान्य श्रेणीतील गॅस सिरेंडरची दरवाढ
केंद्रीय मंत्र्यांच्या माहितीनुसार सामान्य श्रेणीसमवेत उज्ज्वला योजनेतील गॅस सिलेंडरचीसुद्धा दरवाढ करण्यात आली आहे. ज्यामुळं योजनेअंतर्गत मिळणारा 503 रुपयांचा सिलेंडर आता 553 रुपयांना विकला जाणार आहे.
इंडियन ऑईलच्या अधिकृत संकेतस्थळावर देण्यात आलेल्या माहितीनुसार 8 एप्रिलपासून कोलकाता इथं गॅस सिलेंडरचे दर 879 रुपयांवर पोहोचले आहेत. तर, मुंबईत हेच दर 852.90 रुपये आणि चेन्नईमध्ये दर 868.50 रुपयांवर पोहोचले आहेत. लखनऊमध्ये दर 890.50 रुपये, तर पटना इथं 951.00 रुपयांपर्यंत गेले आहेत. जयपूरमध्ये गॅस सिलेंडरचे दर वाढून 856.50 आणि देहरादून इथं 850.50 रुपयांवर पोहोचला आहे.
सदर निर्णयाची अर्थात दरवाढीच्या निर्णयाची भविष्यात समीक्षा केली जाणार असल्याची माहितीसुद्धा केंद्रीय मंत्र्यांनी याबाबतची घोषणा करताना दिली. दर दोन ते तीन आठवड्यांमध्ये दरांबाबतचं समीक्षण करण्यात येत असून, त्याच कारणास्तव उत्पादन शुल्कामध्ये वाढ झाल्याचं लक्षात येतं असं म्हणताना याचा भार सामान्यांनावर येऊ देणार नसल्याचं मंत्र्यांनी स्पष्ट केलं.
