✍️ महाराष्ट्र २४ | विशेष प्रतिनिधी | दि. ३० ऑक्टोबर २०२५ | शेतकऱ्यांचा लढा संपण्याची चिन्हं नाहीत! सरकारकडून आलेला चर्चेचा फोन स्वीकारताही बच्चू कडू ठाम – “आंदोलन सुरूच राहणार!” अशी घोषणा करून त्यांनी पुन्हा एकदा शासनाला हादरा दिला.
चर्चेला बोलावून अटक करण्याचा सरकारचा डाव असल्याचा संशय घेत असलेले माजी आमदार कडू अखेर मुख्यमंत्री देवेंद्र फडणवीस यांच्याशी चर्चेला तयार झाले; पण आंदोलन मागे घेण्यास नकार. “शेतकऱ्यांची संपूर्ण कर्जमाफी मिळेपर्यंत महामार्ग मोकळा नाही!” अशी गर्जना त्यांनी केली.
दरम्यान, नागपूर–वर्धा मार्गावर दुसऱ्या दिवशीही प्रहार जनशक्ती पक्षाचा ट्रॅक्टर-बैलगाडी मोर्चा ठिय्या देऊन बसलेला. पांजरा येथील कापूस संशोधन केंद्राजवळ शेकडो शेतकरी रात्रीभर तंबूत, दिवसभर रस्त्यावर — घोषणाबाजी, आंदोलन आणि संतापाचं वादळ कायम. नागपूर–हैदराबाद महामार्गावर वाहतूक ठप्प, पोलिसांचे नाकेबंदीचे प्रयत्न फसले.
न्यायालयाने आदेश दिला — “संध्याकाळी सहा वाजेपर्यंत रस्ता मोकळा करा!” पण शेतकरी मागे हटले नाहीत. पोलिस आदेश घेऊन आले, पण आंदोलकांनी दणकून विरोध केला. त्यावर कडूंचा संतप्त सवाल —“शेतकरी आत्महत्या करत असताना न्यायालय सरकारला आदेश का देत नाही? आम्ही आंदोलन केलं की तात्काळ न्यायालय हलतं! सरकारने न्यायालय विकत घेतलं का?”
काही आंदोलकांनी रेल्वे रुळांवर उतरून ‘रेल रोको’, तर काहींनी समृद्धी महामार्गावर टायर जाळत निषेध व्यक्त केला. वातावरण तापलेलं! तरीही बच्चू कडू शांत — “चर्चेनेच तोडगा, पण आंदोलन सुरूच!”
राज्य सरकारने दरम्यान राज्यमंत्री आशिष जयस्वाल आणि पंकज भोयर यांना चर्चेसाठी पाठवण्याची घोषणा केली. मात्र आंदोलकांनी स्पष्ट शब्दात सांगितले — “आमच्या मागण्या पूर्ण झाल्याशिवाय शेतकऱ्यांचा रस्ता सुटणार नाही!”