✍️ महाराष्ट्र २४ | विशेष प्रतिनिधी | दि. २३ नोव्हेंबर २०२५ | राज्यातली गुलाबी थंडी कुठे गायब झाली हे हवामान विभागालाही कोडंच पडलंय! उत्तरेकडून येणाऱ्या थंड वाऱ्यांनी अचानक ब्रेक मारला आणि वातावरणाचं गणितच बदललं. हिवाळ्याच्या सरनाईत ‘पावसाची’ अनपेक्षित तान… आणि राज्यभर हवामानाचा राग अचानक बदलला!
कोकण–मध्य महाराष्ट्रात आज आकाश ढगाळ. काही ठिकाणी विजांच्या गडगडाटासह हलक्या पावसाची शक्यता—आणि त्यात गारठा? अक्षरश: गायब!
काल धुळ्यातील कृषी महाविद्यालयात ८.५ अंश हे राज्यातील ‘लो’ तापमान; जळगाव–परभणी कृषी विद्यापीठात पारा ११ अंशांच्या खाली—पण उर्वरित महाराष्ट्रात? थंडीचा विषयच संपला! दुपारच्या उन्हाने अंग भाजायला सुरुवात केली, उकाड्यानं दैनंदिन जीवनाचं तोंड काळं.
डहाणूने तर तिशीचा आकडा सहज पार करून ३५.३°C गाठलं. उत्तर दिशेचे शीत वारे मंदावताच थंडीची गुलाबी चादर घडी घालून निघून गेली… त्याचवेळी वातावरणात पावसाचं आमिष वाढू लागलं.
पुढील काही दिवस काय?
कोकण आणि मध्य महाराष्ट्रात तुरळक पावसाच्या जोरदार सरींचा अंदाज—हिवाळ्यातल्या पावसाची ही अनपेक्षित इनिंग सर्वांनाच बुचकळ्यात टाकतेय.
आरोग्याला इशारा
हवामानातील या उलथापालथीचे दुष्परिणामही दिसू लागले.
सर्दी–खोकल्याचे आजार डोकं वर काढत आहेत. तापमानातील चढ–उताराने तब्येती बिघडण्याची शक्यता वाढली आहे.