✍️ महाराष्ट्र २४ | विशेष प्रतिनिधी | दि. २४ नोव्हेंबर २०२५ | राज्यात स्थानिक स्वराज्य संस्थांच्या निवडणुकांचा बिगुल वाजताच राजकीय दालने तापू लागली आहेत. २४६ नगरपरिषद आणि ४२ नगरपंचायतींसाठी निवडणूक जाहीर होताच सर्व पक्षांनी कंबर कसली आहे. मात्र या तयारीच्या धुरळ्यात मनसे अध्यक्ष राज ठाकरे यांनी केलेलं एक तुफान विधान संपूर्ण राज्यात राजकीय वादळ उठवत आहे.
कोकण महोत्सवात कार्यकर्त्यांना संबोधित करताना राज ठाकरे थेट म्हणाले—
“रात्र वैऱ्याची आहे! गाफील राहू नका! मुंबईवर ज्यांचा डोळा आहे, त्यांचं गणित ओळखा. मतदार यादीमधील खरे-खोटे मतदार ओळखा. नाहीतर येणारी मुंबई महापालिकेची निवडणूक… हीच शेवटची असेल!”
या एका वाक्यानं सभागृहात शांतता पसरली… आणि राजकारणात खळबळ उडाली.
राज ठाकरे पुढे बोलले—
“आपणच जर डोळे मिटले तर महानगरपालिका हातातून गेली म्हणून समजा! त्यानंतरचं या लोकांचं थैमान कुणाच्याही आवाक्यात राहणार नाही. त्यामुळे सजग रहा, प्रत्येक यादी तपासा, प्रत्येक हालचाल पाहा.”
मुंबई मनपेबाबत असा सार्वजनिक इशारा देणारे राज ठाकरे कदाचित पहिल्यांदाच इतक्या टोकाला गेले आहेत. त्यांच्या वक्तव्यावरून आगामी निवडणुका किती तुफानी होणार याची झलक दिसू लागली आहे.
दरम्यान,
2 डिसेंबर रोजी २४६ नगरपरिषद व ४२ नगरपंचायतींचं मतदान
3 डिसेंबर 2025 रोजी मतमोजणी
एकूण 6,859 सदस्यांची निवड, त्यापैकी 3,492 जागा महिलांसाठी आरक्षित
हा टप्पा पार पडताच मुंबईसह राज्यातील सर्व महापालिकांच्या निवडणुका जाहीर होण्याची शक्यता आहे. मुंबई मनपा ला ‘शेवटची निवडणूक’ म्हणणारा राज ठाकरे यांच्या चेतावणीने राजकीय वातावरण तुफान ढवळून निघणार—हे आता निश्चित!