✍️ महाराष्ट्र २४ | विशेष प्रतिनिधी | दि. २९ नोव्हेंबर २०२५ | पुणे : दीड वर्षांहून अधिक काळापासून रखडलेली पुणे आणि पिंपरी-चिंचवड महापालिका निवडणूक अखेर मार्गावर आली आहे. न्यायालयाच्या निर्णयानंतर प्रशासनानेही निवडणुकीची ‘फास्ट ट्रॅक’ तयारी सुरू केल्याचे संकेत मिळत आहेत. त्यामुळे डिसेंबरच्या मध्यावर आचारसंहिता लागू होऊन जानेवारीच्या दुसऱ्या किंवा तिसऱ्या आठवड्यात थेट मतदान—अशी शक्यता अधिकाऱ्यांनी व्यक्त केली आहे.
निवडणुकीच्या प्रतीक्षेत असलेल्या इच्छुक उमेदवारांनी तर निर्णय जाहीर होताच सोशल मीडियावर आनंदाच्या पोस्टांचा अक्षरश: पाऊस पाडला. अनेकांनी ‘आता खरी धावपळ!’ असे लिहीत आडाखे, अंदाज आणि गणितं मांडायला सुरुवातही केली आहे.
दरम्यान, महापालिकेने निवडणूक प्रक्रिया व्यवस्थित सुरू केली असल्याचे सांगण्यात आले. प्रभाग रचना, प्रभागनिहाय आरक्षण, प्रारूप मतदार यादी… सर्व पायऱ्या पार केल्यानंतर आता शेवटचं मोठं पाऊल—निवडणूक कार्यक्रम जाहीर करणं—याच्यासाठी सगळ्यांचे डोळे उघडे आहेत.
“पुणे महापालिकेने ५० टक्के आरक्षण मर्यादेचे पालन केले आहे. त्यामुळे निवडणुकीसाठी कोणतीही अडचण नाही,”
— प्रसाद काटकर, उपायुक्त, निवडणूक विभाग