✍️ महाराष्ट्र २४ | विशेष प्रतिनिधी | दिनांक ५ डिसेंबर २०२५ | पुण्यात प्रवास करणाऱ्यांना बसचालकांच्या तंबाखू सेवनाचा त्रास नवा नाही. तोंडात पान-गुटखा भरून ड्रायव्हिंग, थुंकण्याने रस्त्यांवर पडणारे लाल डाग आणि प्रवाशांना बसत असलेला त्रास – या सगळ्यामुळे पीएमपीएमएलची प्रतिमाच मलीन होत असल्याची तक्रार कायम होती. अखेर हा प्रकार रोखण्यासाठी प्रशासनाने मोठे पाऊल उचलले आहे.
पीएमपीएमएलचे अध्यक्ष आणि व्यवस्थापकीय संचालक पंकज देवरे यांनी चालकांसाठी तंबाखूजन्य पदार्थांवर पूर्ण बंदी घालण्याचे आदेश दिले आहेत. ड्युटीवर असताना कोणताही चालक गुटखा, तंबाखू, पान खाताना किंवा रस्त्यावर थुंकताना आढळला, तर त्वरित कारवाई होणार आहे. चालकांच्या हलगर्जीपणामुळे संस्थेची प्रतिमा खराब होऊ नये, असा स्पष्ट इशारा देवरेंनी दिला.
नवा नियम सरळ आणि कडक — तंबाखू खाताना किंवा थुंकताना पकडला गेल्यास चालकावर थेट १,००० रुपयांचा दंड आकारला जाणार आहे. “हे वर्तन म्हणजे प्रवाशांसमोर पीएमपीएमएलची प्रतिष्ठाच मलिन करणं,” असे देवरे यांनी स्पष्ट शब्दांत सांगितले. दंड आकारणी कोणत्याही परिस्थितीत टळणार नाही, असा प्रशासनाचा निर्धार आहे.
या निर्णयानंतर चालकांमध्येही जागरूकता वाढल्याचे दिसत आहे. प्रवाशांचे आरोग्य, शहराची स्वच्छता आणि संस्थेची प्रतिमा यांना प्राधान्य देत हा नियम लागू करण्यात आला आहे. पुढील काही दिवसांत नियमांची कडक अंमलबजावणी होणार असून, नियमभंग करणाऱ्यांवर निश्चित दंडात्मक कारवाई केली जाईल, अशी माहिती देवरेंनी दिली.