✍️ महाराष्ट्र २४ | विशेष प्रतिनिधी | दिनांक १५ डिसेंबर २०२५ | आठवड्याच्या पहिल्याच दिवशी देशांतर्गत सराफा बाजारात सोन्या-चांदीच्या दरांमध्ये घसरण नोंदवण्यात आली आहे. मागील काही दिवसांपासून सातत्याने वाढणाऱ्या सोन्याच्या दरांना आज अचानक ब्रेक लागला असून, गुंतवणूकदार आणि ग्राहकांसाठी ही काहीशी दिलासादायक बाब ठरली आहे. आज, १५ डिसेंबर रोजी सकाळी दिल्लीत २४ कॅरेट सोन्याचा दर १० ग्रॅममागे १,३४,०६० रुपये, तर २२ कॅरेट सोन्याचा दर १,२२,८९० रुपये इतका नोंदवण्यात आला. कालच्या तुलनेत हे दर किंचित खाली आले आहेत.
महत्त्वाची बाब म्हणजे, आजची घसरण असूनही मागील एका आठवड्यात सोन्याने जोरदार उसळी घेतली होती. अवघ्या सात दिवसांत २४ कॅरेट सोन्याचा दर सुमारे ३,७७० रुपयांनी, तर २२ कॅरेट सोन्याचा दर ३,४५० रुपयांनी वाढला होता. त्यामुळे आजची घसरण ही नफावसुलीचा परिणाम असल्याचे बाजारतज्ज्ञांचे मत आहे. आंतरराष्ट्रीय बाजारातील किंमत चढ-उतार, डॉलर निर्देशांकातील बदल आणि गुंतवणूकदारांची सावध भूमिका याचा थेट परिणाम सोन्याच्या दरांवर होताना दिसत आहे.
देशातील प्रमुख शहरांमध्ये आज सोन्याचे दर जवळपास समान पातळीवर आहेत. मुंबई, चेन्नई आणि कोलकाता येथे २४ कॅरेट सोन्याचा दर १,३३,९०० रुपये प्रति १० ग्रॅम, तर २२ कॅरेटचा दर १,२२,७४० रुपये आहे. पुणे आणि बेंगळुरू या शहरांमध्येही याच दरात सोन्याची खरेदी-विक्री सुरू असून, मोठ्या शहरांमध्ये दरांमध्ये फारसा फरक जाणवत नाही.
दरम्यान, २०२५ हे वर्ष सोन्यासाठी अत्यंत फायदेशीर ठरले आहे. आतापर्यंत देशांतर्गत बाजारात सोन्याच्या किमतींमध्ये सुमारे ६५ टक्क्यांची वाढ झाली आहे. जागतिक राजकीय-अर्थिक अनिश्चितता, मध्यवर्ती बँकांकडून वाढलेली सोन्याची खरेदी आणि डॉलरच्या तुलनेत रुपयाचे अवमूल्यन या कारणांमुळे सोन्याचे दर उच्चांकावर पोहोचले. तज्ज्ञांच्या मते, ही परिस्थिती कायम राहिल्यास २०२६ मध्ये सोन्याचे दर आणखी ५ ते १६ टक्क्यांनी वाढू शकतात.
सोन्यासोबतच आज चांदीच्या दरातही घसरण झाली आहे. चांदीचा दर १,९७,९०० रुपये प्रति किलो इतका नोंदवण्यात आला आहे. मात्र, मागील आठवड्यात चांदीने तब्बल ८,००० रुपयांची वाढ दर्शवली होती. आंतरराष्ट्रीय बाजारात सध्या चांदीचा भाव ६४.५७ डॉलर प्रति औंस इतका आहे.