✍️ महाराष्ट्र २४ | विशेष प्रतिनिधी | दि. ३ जानेवारी २०२६ | पुणे विमानतळावरून आंतरराष्ट्रीय प्रवास करणाऱ्या प्रवाशांसाठी अखेर अच्छे दिन उतरले आहेत—तेही थेट इमिग्रेशननंतर!आतापर्यंत परदेशातून पुण्यात उतरल्यानंतर प्रवाशांना वाटायचं, “फ्लाइट संपली, पण परीक्षा अजून बाकी आहे.”बॅगा, रांगा, तपासणी, प्रश्न—आणि वेळेचा बोजवारा.आता मात्र चित्र बदललं आहे. पुणे विमानतळावर ‘ग्रीन चॅनेल’ सुरू झाला आणि प्रवाशांना थेट बाहेर पडण्याचा हिरवा कंदील मिळाला.
आधी काय होतं?पुणे विमानतळावर जागा कमी, उड्डाणे कमी—पण तपासणी मात्र सगळ्यांसाठी समान!ज्यांच्याकडे एक चॉकलेटही जादा नसेल, त्यांनाही ‘रेड चॅनेल’ची शिक्षासीमा शुल्क भरण्याचा प्रश्न नसलेल्या प्रवाशालाही संशयितासारखी वागणूक.परिणाम—४० ते ५० मिनिटांचा वेळ फुकट.
आता ‘ग्रीन चॅनेल’ सुरू झाल्यामुळे चित्र पालटलं आहे.ज्यांच्याकडे सीमा शुल्क आकारणीस पात्र काहीच नाही, ते प्रवासी थेट बाहेर! तपासणी फक्त संशयितांची.म्हणजे गुन्हा नसेल, तर शिक्षा नाही—लोकशाहीचा हा नियम अखेर विमानतळावर लागू झाला आहे!
विशेष म्हणजे पुणे विमानतळावर सध्या केवळ तीन आंतरराष्ट्रीय उड्डाणे आहेत.इतक्या कमी उड्डाणांसाठीही आजवर ‘ग्रीन चॅनेल’ नव्हता, हे ऐकून प्रवासीच नव्हे तर सामानही चकित झालं असेल.‘सकाळ’ने पाठपुरावा केल्यानंतर सीमा शुल्क विभाग जागा झाला, हेही तितकंच महत्त्वाचं.
‘ग्रीन चॅनेल’ म्हणजे काय, हे सांगताना अधिकारी सांगतात—“तुमच्याकडे सोने नाही, जादा दारू नाही, परदेशी चलन मर्यादेत आहे, आणि विक्रीसाठी काही नाही? मग तुम्ही मोकळे!”स्वयंघोषणा द्या आणि सरळ बाहेर.अर्थात, अधिकाऱ्यांना संशय आला, तर तपासणी होणारच.पण ‘संशय’ हा अपवाद, ‘तपासणी’ ही शिक्षा—हा जुना फॉर्म्युला आता बदलतोय.
या निर्णयामुळे प्रवाशांचा वेळ वाचणार, चिडचिड कमी होणार आणि पुणे विमानतळाची प्रतिमा सुधारणार.आजवर “छोटं विमानतळ, मोठा त्रास” अशी ओळख होती.आता किमान आंतरराष्ट्रीय प्रवाशांसाठी तरी “छोटं विमानतळ, सोयीचं विमानतळ” अशी ओळख तयार होईल.
“पुणे विमानतळावर अखेर हिरवा सिग्नल मिळाला आहे. आता विमान थांबतंय, पण प्रवासी अडकत नाहीत—हीच खरी प्रगती!”