Pimpri Municipal Election Polling: 🗳️ लोकशाहीचा उत्सव नव्या रंगात! पिंपरी-चिंचवडमध्ये नाविन्यपूर्ण मतदान केंद्रांची संकल्पना; पर्यावरण, आरोग्य अन् महिलांसाठी खास उपक्रम 🗳️

Spread the love

महाराष्ट्र 24 | विशेष प्रतिनिधी | दि. १५ जानेवारी | पिंपरी-चिंचवड महापालिका निवडणूक म्हणजे केवळ मतदानाची प्रक्रिया न राहता यंदा ती लोकशाही, पर्यावरण आणि सामाजिक जाणीवेचा जागर ठरणार आहे. मतदारांना मतदानासाठी प्रोत्साहित करतानाच नागरिकांच्या जबाबदारीची जाणीव करून देण्यासाठी महापालिकेने नाविन्यपूर्ण मतदान केंद्रांची भन्नाट संकल्पना राबवली आहे. गुरुवार (दि. १५) रोजी होणाऱ्या मतदानासाठी शहरातील आठही क्षेत्रीय कार्यालयांच्या हद्दीत प्रत्येकी एक अशा एकूण आठ विशेष थीमवर आधारित मतदान केंद्रांची उभारणी करण्यात आली आहे. यामुळे मतदान केंद्र म्हणजे केवळ मत टाकण्याचं ठिकाण न राहता, समाजप्रबोधनाचं व्यासपीठ बनलं आहे.

या नाविन्यपूर्ण मतदान केंद्रांमधून सौर ऊर्जा, हरित जीवनशैली, स्वच्छता, आरोग्य, जलसंवर्धन आणि शाश्वत विकास यांसारख्या महत्त्वाच्या विषयांचा प्रभावी संदेश दिला जात आहे. आकुर्डी येथील न्यू पुणे पब्लिक स्कूलमध्ये सौर ऊर्जेवर आधारित मतदान केंद्र उभारून अक्षय ऊर्जेचे महत्त्व अधोरेखित करण्यात आले आहे. चिंचवड येथील आचार्य आनंद ऋषींजी स्कूलमध्ये ‘हरित मतदान केंद्र’ साकारून पर्यावरणपूरक जीवनशैलीचा आग्रह धरला आहे. तर मोशी येथील सावित्रीबाई फुले शाळेत ओला व सुका कचरा वर्गीकरण या विषयातून स्वच्छतेचा धडा दिला जात आहे.

शहराच्या विविध भागांमध्ये वेगवेगळ्या संकल्पना प्रभावीपणे राबवण्यात आल्या आहेत. चिखलीतील जाधववाडी प्राथमिक विद्यालयात RRR (Reduce, Reuse, Recycle) संकल्पनेद्वारे शाश्वत विकासाचा संदेश देण्यात आला आहे. पिंपळे सौदागर येथील जी. के. गुरुकुल स्कूलमध्ये ‘तंदुरुस्त रहा’ या थीमद्वारे नागरिकांना आरोग्यदायी जीवनशैलीचा संदेश देण्यात येतोय. थेरगाव येथील प्रिन्स सोसायटीमध्ये स्वच्छ हवा कृती आराखडा, तर कासारवाडी येथील महापालिका शाळेत पंचतत्त्व या संकल्पनेतून पृथ्वी, जल, अग्नी, वायू व आकाश यांचा समतोल राखण्याचं महत्त्व पटवून दिलं जात आहे. या सर्व केंद्रांमध्ये सजावट, माहितीपर फलक आणि जनजागृती संदेशांमुळे मतदारांचे लक्ष वेधले जात आहे.

विशेष बाब म्हणजे महिला मतदारांसाठी उभारण्यात आलेले ‘पिंक बूथ’. शहरातील आठही क्षेत्रीय कार्यालयांमध्ये हे पिंक बूथ कार्यरत असून, येथे महिला कर्मचारी, स्वयंसेविका आणि सुरक्षारक्षक तैनात आहेत. महिलांना सुरक्षित, सुलभ आणि उत्साहवर्धक वातावरणात मतदान करता यावे, हा यामागचा उद्देश आहे. स्वतंत्र सुविधा, स्वच्छ व आकर्षक वातावरण आणि महिलांकडूनच मार्गदर्शन — यामुळे महिला मतदारांचा सहभाग वाढवण्याचा महत्त्वाकांक्षी प्रयत्न करण्यात आला आहे. एकूणच, पिंपरी-चिंचवडमधील हे मतदान केंद्र लोकशाहीला अर्थ देणारे, समाजाला दिशा देणारे आणि मतदारांना प्रेरणा देणारे ठरत आहेत.