महाराष्ट्र 24 | विशेष प्रतिनिधी | दि. २१ जानेवारी | अमेरिकेचे माजी–भावी–नेहमीच चर्चेत असणारे राष्ट्राध्यक्ष डोनाल्ड ट्रम्प यांनी पुन्हा एकदा जगाला आठवण करून दिली की राजकारण हा खेळ नाही, तो थेट खिशावरचा हल्ला आहे! ‘टॅरिफ वॉर’ची धमकी काय दिली, आणि भारतीय शेअर बाजाराने अक्षरशः धसका घेतला. सेन्सेक्स कोसळला, निफ्टी घसरला आणि गुंतवणूकदारांचे तब्बल दहा लाख कोटी रुपये एका दिवसात हवेत विरले. हे पैसे कुठे गेले, असा प्रश्न कुणी विचारू नये—कारण शेअर बाजारात पैसा जात नाही, तो फक्त “भावनांच्या गर्तेत” अदृश्य होतो! सेन्सेक्स १०६६ अंकांनी घसरून ८२ हजारांवर आला, निफ्टीही तोंडावर आपटला. महिन्याभरात ३ हजार अंकांची घसरण म्हणजे बाजाराने गुंतवणूकदारांना सांगितलेला थेट संदेश—“जोखीम आहे, पण धीर धर!”
बाजार कोसळला की एक गोष्ट हमखास घडते—लोक शेअर विकून सोन्याकडे धाव घेतात. आणि सोनं? ते तर आधीच तयार बसलेलं! दिल्लीत सोन्याने १.५० लाखांचा टप्पा ओलांडून असा काही इतिहास रचला की दागिन्यांची दुकाने जणू संग्रहालयं झाली. चांदी तर आणखी पुढे—३.२३ लाख रुपये किलो! म्हणजे पूर्वी चांदीची वाटी असायची, आता चांदी म्हणजे थेट मालमत्ता. एका दिवसात सोनं ५ हजारांनी वाढलं, चांदी २० हजारांनी उडी मारली—हे पाहून सामान्य माणूस म्हणतो, “शेअर घ्यायला पैसा नाही, सोनं घ्यायला हिंमत नाही!” बाजार कोसळतो तेव्हा सुरक्षित गुंतवणूक चमकते, हे जुनेच सूत्र आहे. फरक इतकाच की आता सुरक्षिततेची किंमतही असुरक्षित झाली आहे.
या सगळ्या गोंधळात रुपया मात्र शांतपणे, पण ठामपणे घसरत राहिला. डॉलरसमोर तो ९०.९७ या ऐतिहासिक तळाला पोहोचला—जणू म्हणतोय, “मी अजून खाली जाऊ शकतो!” जागतिक तणाव, विदेशी गुंतवणूकदारांची माघार, आयात खर्च—सगळ्याचा फटका रुपयाला बसतो आणि सामान्य माणसाला महागाईच्या रूपात तो जाणवतो. ट्रम्प अमेरिकेत बोलतात, बाजार मुंबईत पडतो, आणि परिणाम नागपूर–नाशिकपर्यंत पोहोचतो—हीच आजची जागतिक अर्थव्यवस्था! एकूण काय, एका माणसाच्या धमकीने दहा लाख कोटी उडाले, सोनं–चांदी आकाशात गेली आणि रुपया जमिनीवर आला. शेअर बाजाराने पुन्हा एकदा सिद्ध केलं—इथे तर्क कमी आणि ट्रम्प जास्त चालतो!