✍️ महाराष्ट्र २४ ।। ऑनलाईन ।। विशेष प्रतिनिधी ।। दि. १५ मार्च २०२६ ।। घरगुती गॅस वापरणाऱ्या लाखो ग्राहकांसाठी केंद्र सरकारने महत्त्वाचा निर्णय जाहीर केला आहे. आता एका घरात पाईप गॅस आणि सिलिंडर गॅस अशी दोन्ही सुविधा ठेवण्यावर निर्बंध आणण्यात आले आहेत. Ministry of Petroleum and Natural Gasने जाहीर केलेल्या नव्या नियमांनुसार ज्या कुटुंबांकडे आधीच Piped Natural Gas (PNG) कनेक्शन आहे, त्यांना पुढे घरगुती Liquefied Petroleum Gas सिलिंडर मिळणार नाही. त्यामुळे सध्या दोन्ही सुविधा वापरणाऱ्या ग्राहकांना त्यांचे एलपीजी कनेक्शन परत करावे लागणार आहे. सरकारच्या मते, गॅसचा काळाबाजार रोखणे आणि एकाच नावावर असलेली अनेक कनेक्शन बंद करणे हा या निर्णयामागचा मुख्य उद्देश आहे.
नव्या नियमांनुसार गॅस ग्राहकांसाठी ई-केवायसी (e-KYC) प्रक्रिया अनिवार्य करण्यात आली आहे. ज्यांनी अद्याप आपली बायोमेट्रिक ओळख अद्ययावत केलेली नाही, त्यांना नवीन गॅस कनेक्शन मिळण्यात अडचणी येऊ शकतात. विशेषतः Aadhaar Cardशी लिंक नसेल किंवा पत्त्याची माहिती जुळत नसेल, तर गॅस कनेक्शन मंजूर होणार नाही. याशिवाय जुन्या एलपीजी ग्राहकांनाही ठराविक मुदतीत केवायसी अपडेट करणे बंधनकारक असेल. अन्यथा त्यांच्या सिलिंडर बुकिंगवरही बंदी येऊ शकते, असा इशारा सरकारकडून देण्यात आला आहे.
या नव्या नियमावलीनुसार आता एकाच घरात PNG आणि LPG अशी दोन्ही कनेक्शन ठेवणे बेकायदेशीर ठरणार आहे. ज्यांच्याकडे सक्रिय PNG कनेक्शन आहे, ते पुढे एलपीजी सिलिंडर बुक करू शकणार नाहीत. तसेच PNG वापरणाऱ्या ग्राहकांना नवीन घरगुती एलपीजी कनेक्शनसाठी अर्जही करता येणार नाही. सरकारच्या मते, या निर्णयामुळे गॅस वितरण व्यवस्थेत पारदर्शकता येईल आणि गरजू कुटुंबांना सिलिंडर उपलब्ध करून देणे सोपे होईल. मात्र या नव्या नियमामुळे अनेक शहरी कुटुंबांना त्यांच्या गॅस वापराच्या सवयी बदलण्याची वेळ येणार असल्याची चर्चा सुरू झाली आहे. 🔥🧯